Dashnor Sula: Shtohen kontrollet për një sezon turistik të sigurt, fokus te siguria ushqimore dhe plazhet publike

Në Tiranë është zhvilluar Konferenca Kombëtare për Turizmin “Adriatik 2026”, një forum i dedikuar forcimit të standardeve dhe rritjes së sigurisë në sektorin turistik, ku morën pjesë përfaqësues të institucioneve përgjegjëse për mbikëqyrjen dhe zhvillimin e turizmit në vend.

Gjatë aktivitetit, drejtuesi i Kryeinspektoriatit të Përgjithshëm, Dashnor Sula, theksoi se rritja e vazhdueshme e turizmit në Shqipëri shoqërohet me përgjegjësi më të mëdha për institucionet publike. Sipas tij, garantimi i shërbimeve cilësore, sigurisë për qytetarët dhe turistët, si dhe respektimi i kuadrit ligjor dhe mjedisor mbeten elementë thelbësorë për zhvillimin e qëndrueshëm të sektorit.

Në fokus të diskutimeve u vendosën disa nga sfidat kryesore me të cilat përballet turizmi, përfshirë sigurinë ushqimore dhe shëndetin publik, mbrojtjen e mjedisit dhe territorit, mbikëqyrjen e tregut, respektimin e të drejtave të punëmarrësve dhe luftën kundër informalitetit.

Pjesëmarrësit nënvizuan nevojën për një qasje më moderne të inspektimit, të mbështetur në analizën e riskut, parandalimin e problematikave dhe koordinimin e ngushtë ndërinstitucional. Sipas tyre, rritja e efikasitetit të kontrolleve lidhet drejtpërdrejt me forcimin e bashkëpunimit mes institucioneve dhe shkëmbimin në kohë të informacionit.

Një tjetër çështje e trajtuar gjatë konferencës ishte digjitalizimi i proceseve administrative, i konsideruar si një instrument i rëndësishëm për rritjen e transparencës dhe përmirësimin e shërbimeve publike në sektorin e turizmit.

Në kuadër të procesit të integrimit europian, pjesëmarrësit ritheksuan rëndësinë e përafrimit me standardet e Bashkimit Europian dhe zbatimit të tyre në praktikë, me synim ndërtimin e një sektori turistik më të sigurt, më të qëndrueshëm dhe më konkurrues.

Konferenca u mbyll me thirrjen për bashkëpunim të vazhdueshëm mes institucioneve dhe aktorëve të sektorit, duke theksuar se zhvillimi i një turizmi cilësor dhe të sigurt kërkon angazhim të përbashkët dhe koordinim të vazhdueshëm në të gjitha nivelet.