Zbulohen mesazhet / Protestuesit plan për të hyrë me forcë në Kryeministri dhe burgun 302. A po tenton Berisha të përsërisë grushtin e shtetit të 14 shtatorit ’98?

Mesazhet e shkëmbyera mes një grupi organizator të protestës kundër qeverisë dhe sistemit politik zbulojnë edhe skenarët për grusht shteti, përmes pushtimit të Kryeministrisë me forcë, plane të cilat reflektohen edhe mesazhet luftarake publike të disa prej përfaqësuesve të ‘revolucionit’. Një nga organizatorët në prapaskenë të protestës, i identifikuar si militant i PD-së, propozon për të nxitur turmën për të hyrë me forcë në Kryeministri.

Ndërsa një tjetër anëtar i grupit organizator propozon për të hyrë me forcë në burgun Mine Peza në Tiranë, i njohur si burgu 302, ‘për të nxjerrë çunat’, duke iu referuar protestuesve të arrestuar për dhunën para Parlamentit. Mesazhet mes grupit në Telegram janë shkëmbyer gjatë protestës së sotme, pasi ashtu siç ishte planifikuar, një grup protestuesish, rreth orës 24, kanë shkuar te burgu 302, duke thyer xhamat.

Protestuesit marshuan drejt komisariatit mes thirrjeve lironi çunat, ndërsa disa prej tyre kanë arritur të thyejnë xhamat e godinës mes thirrje policia e krimit. Policia ka reaguar duke i shpërndarë me ujë. Në komunikimet mes grupit flitet edhe për disa personazhe me maska, të cilët më pas sulmuan burgun Mine Peza.

Pas përplasjeve mes një grupi protrestuesish dhe policisë te burgu 302, ka pasur edhe mosmarrëveshje mes grupit të organizatorëve. Njëri prej tyre kërkon që protestuesit të largohen nga burgu 302 përveç militantëve, duke iu referuar militantëve të PD-së.