Dhunimi i Ilir Demaliajt, gazetari sqaron ngjarjen: Dy persona më goditën me grushte sa dola nga shtëpia, thanë se kisha lajmëruar policinë për…

Në një lidhje live nga spitali për Top Channel, gazetari dhe analisti Ilir Demaliaj ka sqaruar ngjarjen se si u dhunua barbarisht sot, sapo doli nga shtëpia, nga dy persona të cilët e goditën me grushte.

“Po dilja nga shtëpia dhe dy veta të lagjes, që kanë dyqan aty, më sulmuan. Një polic po i vinte gjobë për parkim të gabuar. Më goditën me grushte se thanë që kam lajmëruar policinë, por nuk e kisha lajmëruar unë.

Nuk i kam borxh njeriu dhe as armiqësi, por kërcënime të vazhdueshme kam pasur, urrejtje kot. Si shqiptarët, shahemi online, në media, jemi një popull që veç urrejmë, por nuk e kuptojmë që me këtë do të shkatërrojmë vetveten.

Shumë njerëz më thonë pse rri, unë rri ku të më dojë qejfi mua. Nuk besoj që më rrahën për qëndrimet e politikës, por pse kam ngritur problemin për të pastruar parkimin e asaj zone, se nuk hyjmë dot në shtëpi. Këtu është vendi i cubave. Më dhunuan në sy të policisë. Po i kërkon policia, i ka gjetur, por nuk e di nëse i kanë kapur. A ka shtet këtu? E bëra denoncimin”, ka shpjeguar ai.

Policia ka identifikuar njërin prej autorëve të dyshuar dhe e ka shpallur në kërkim.

/TCH