Sot iu sekustrua pasuria / Ja zyrtarët që i dhanë 33 tendera mafiozit Gentian Sharra. Endri Mullai, Naqellari, Gledjan Llatja dhe Kastriot Gurra ndanë 14 mln USD me ushtarin e Talo Çelës

Me kërkesë të Prokurorisë së Elbasanit, gjykata ka vendosur sot sekuestrimin e pasurisë së Gentian Sharrës, me vlerë 5 milionë euro.

Gentian Sharra është dënuar më parë për trafik droge, ndërsa rezulton pjesë e bandës së Talo Çelës në disa grabitje me dhunë gjatë 10 viteve të fundit.

Pjesë e grabitjeve është edhe vjedhja e famshme e parave në Rinas.

Gentian Sharra u fundos nga rrëfimi i Nuredin Dumanit, i cili e implikoi në disa grabitje me dhunë.

Policia doli sot me njoftim mbi operacionin e sekustrimit të pasurive të 49-vjeçarit Gentian Sharra.

Por, ajo që po fshihet nga policia dhe mediat është diçka edhe më e rëndë se sa grabitjet me dhunë.

Nga dokumentet e siguruara nga ‘Prapaskena’, Gentian Sharra ka marrë rreth 33 tendera me vlerë 14 milionë USD nga drejtorët dhe kryebashkiakët e pushtetit aktual.

Edhe pse i dënuar dhe i dyshuar për grabitjen e Rinasit si ushtar i Talo Çelës, kryebashkiakë dhe drejtorë kanë ndarë paratë publike me Gentian Sharrën.

Skema e korrupsionit

Prapaskena zbulon se Gentian Sharra i ka marrë paratë publik përmes bashkëshortes së tij, Olta Sharra, e regjistruar si person fizik, pasi Gentian Sharra kishte kryer disa grabitje me dhunë dhe ishte dënuar për trafik droge.

Olta Sharra në fakt nuk ka asnjë lidhje me këtë biznes. Ajo punon si bibliotekare në Elbasan.

Prapaskena ka zbuluar se biznesi është krijuar në janar të 2013 dhe administrohet nga anëtari i bandës së Talo Çelës, Gentian Sharra, aktualisht në kërkim nga SPAK, pa rrëfimeve të Nuredin Dumanit.

Fillimisht Gentian Sharra hapi servis makinash, ku dyshohet se u modifikua furgoni për grabitjen e famshme në Rinas, ndërsa më pas ndryshoi objektin e veprimtarisë, në shërbim gatimi dhe shitje mishi.

Endri Mullai dhe Naqellari

Nga dokumentet e siguruara nga Prapaskena rezulton se tenderin e fundit Gentin Sharra, me vlerë 2.4 milionë USD, për blerje mishi, e ka marrë nga Agjencia e Blerjeve të Përqendruara, disa ditë para se të shpallej në kërkim nga SPAK.

Tenderi i dyshuar si korruptiv është firmosur nga Endri Mullai, drejtori i Agjencisë ë Blerjeve të Përqendruara, agjenci e cila një vit më parë ishte objekt goditje nga SPAK për skandalin e tenderit të uniformave të policisë, me vlerë 27 milionë USD, ku u arrestuan 9 zyrtarë, mes të cilëve edhe drejtoresha Edlira Naqellari, e dënuar me 1 vit burg.

Tenderat e tjerë me vlerë mbi 10 milionë USD Sharra i ka marrë nga ish drejtoresha Edlira Naqellari, e cila duhet të tregojë për SPAK se kush e ka ardhuruar që të ndajë paratë publike me një grabitës dhe trafikant droge.

Edlira Naqellari ka shpallur fituese me paracaktim gruan e Gentian Sharrës për tendera me vlerë miliona euro për mish, gatim dhe shpërndarje ushqimi, për spitalet, drejtorinë e burgjeve etj.

Gledjan Llatja dhe Kastriot Gurra

Mbi 20 tendera për furnizim me mish dhe gatim, Gentian Sharra i ka marrë nga kryetari i Bashkisë së Elbasanit Gledjan Llatja dhe kryetari i Bashkisë së Librazhdit, Kastriot Gurra.

Dy kryebashkiakët janë lakuar për korrupsion dhe si të kapur nga krimi i organizuar. Gledjan Llatja duket se është nën kontrollin e Talo Çelës dhe Sharrës, pasi i ka dhënë këtij të fundit tendera me vlerë milione euro për shërbim gatimi dhe shpërndarje ushqimi, me ofertë gati sa fondi limit.

Drejtorët e Spitalit Psikiatrit Elbasan

Edhe drejtorët e Spitalit Psikiatrit të Elbasanit kanë ndarë miliona euro me grabitësin famëkeq Gentian Sharra, i kamufluar me gruan e tij, Olta Sharra. Në një rast, nga Spitali Psikiatrit Olta Sharra ka marrë një tender me paracaktim me vlerë rreth 2.5 milionë euro.

Kujtojmë që tenderat Gentian Sharra i ka marrë pas vitit 2016, kur ndërkohë vijonte grabitjet me dhunë me Talo Çelën.

Sharra ka ngritur kompaninë me para të grabitura dhe më pas ka nisur të marrë para publike, falë lidhjes me funksionarë publikë.

Prapaskena do të publikojë në vijim sekserët e Gentian Sharrës që kanë ndërhyrë tek drejtorët dhe kryebashkiakët për të marrë tenderat korruptivë, si janë ndarë paratë etj.