Ditën e sotme, ministrja e Infrastrukturës, Belinda Balluku pranoi largimin e kompanisë së investitorit Mohamed Alabbar nga projekti i ndërtimit të portit të Durrësit duke i shitur aksionet te një kompani offshore, lajm i cili doli vitin e kaluar.
Ministrja Balluku është shprehur se nesër do të ketë një interpelancë kërkuar nga deputeti Ferdinand Xhaferraj, ku edhe do japë informacionet e nevojshme.
“E para, kompania statusin e investitorit e ka marrë nga AIDA dhe pyetjen duhet ta merrni nga kjo kompani. Por nesër ka një seancë të kërkuar nga deputeti Xhaferi. Fantazmë apo jo është diçka që e thotë opozita. Duhet të thelloheni në dokumente. Lëvizjet mes kompanive janë normale për sa kohë ato kanë akte ligjore. Besoj se do merrni përgjigjet”, tha Balluku.
Zyrtarisht, qeveria paraqiti si zhvillues dhe financues të projektit, themeluesin e grupit arab Emaar, Muhamed Alabbar. Por me sa duket, Alabbar vendosi që të vijë në Shqipëri, jo përmes grupit Emaar, por me kompani offshore nga ishujt Kejmen.
