Kriza bjelloruse pas pengmarrjes së gazetarit opozitar nga Llukashenko, dhe vendimit të BE për të bllokuar hapësirën ajrore bjelloruse i ka komplikuar edhe më shumë gjërat.
Rusia ka bllokuar të gjithë fluturimet e linjave kryesore europiane. Kështu: Austrian Airlines dhe Air France kanë anuluar fluturimet për në Moskë sepse pala ruse nuk ishte dakord të ndryshonte itinerarin e fluturimeve duke anashkaluar Bjellorusinë.
Një përfaqësues i ndërmarrjes franceze i tha ‘Sputnik’ se fluturimi AF1154, i cili supozohej të shkonte nga Parisi në Moskë, u shty. E njëjta gjë ndodhi me fluturimin Vjenë-Moskë të Austrian Airlines.
Sipas kompanisë “Air France”, udhëtarëve u është ofruar ose të shtyjnë fluturimin për një datë tjetër, ose të marrin paratë e tyre për biletën.
“Austrian Airlines ka pezulluar fluturimet mbi hapësirën ajrore Bjelloruse deri në një njoftim tjetër, bazuar në një rekomandim nga Agjencia e Sigurisë së Aviacionit të BE (EASA). Për atë arsye, është e nevojshme të rregullohet rruga e fluturimit nga Vjena në Moskë. Ndryshimet në rrugën e fluturimit duhet të miratohen nga autoritetet. Autoritetet ruse nuk na e dhanë këtë leje. Kjo është arsyeja pse “Austrian Airlines” u detyrua të anulonte fluturimin e djeshëm nga Vjena në Moskë “, tha kompania austriake kur u pyet për të komentuar anulimin e fluturimit në mëngjes nga Vjena në Moskë.
Sot, EASA(Agjencia Ajrore Europiane) rekomandoi që linjat ajrore evropiane të shmangin hapësirën ajrore të Bjellorusisë deri në fund të hetimit ndërkombëtar për incidentin me uljen e detyruar të avionit të kompanisë “Ryan Air” në Minsk.
Incident me ulje të detyruar në Minsk
Një aeroplan i ndërmarrjes “Ryan Air”, i cili po fluturonte nga Athina në Vilnius, u detyrua të ulej në 23 maj në aeroportin e Minskut për shkak të njoftimit se ishte vendosur një bombë. Xhenierët u dërguan menjëherë në vendin e ngjarjes. Informacioni në lidhje me bombën nuk u konfirmua dhe Komiteti Hetimor i Bjellorusisë njoftoi se kishte filluar procedim penal për shkak të një raporti të rremë në lidhje me bombardimin.
Aktivistët bjellorusë për të drejtat e njeriut thanë se themeluesi i kanalit në Telegram “Next”, i cili konsiderohet opozitar në Bjellorusi, Roman Protasevich, fluturoi me këtë aeroplan dhe se ai u arrestua ndërsa kontrollonte dokumentet në aeroportin në Minsk. Protasevich është futur në listën e njerëzve të përfshirë në terrorizëm në këtë vend. Procedimi penal u krijua kundër tij për disa akuza, përfshirë për “organizimin e trazirave masive”. Ai përballet me një akuzë që e rrezikon deri më 15 vjet burg. Së bashku me Protasevich, shtetasja ruse Sofia Sapega u arrestua në Minsk.
Bjellorusia, nga ana e saj, njoftoi se informacioni për bombardimin e avionit arriti në postën elektronike të aeroportit të Minskut. Komandanti i ekuipazhit mori vendimin për të zbarkuar në Minsk.
Kjo provokoi kritika nga Perëndimi, megjithëse praktika e uljes së detyruar të avionëve kishte ndodhur më parë. Rasti më domethënës ishte detyrimi i avionit të Presidentit Bolivian Evo Morales të ulej në Vjenë në 2013. Arsyeja për këtë ishin thashethemet se ish-agjenti i CIA-s Edward Snowden, i cili akuzohet për zbulimin e sekreteve shtetërore në Shtetet e Bashkuara, është në aeroplan së bashku me presidentin./
