Kryetari i Komisionit, Alket Hyseni i cili lexoi raportin përfundimtar tha se sjellja e presidenti duhet të ishte në unitet dhe ekuilbrues në jetën politikë të vendit, por kjo gjë nuk ka ndodhur pasi me deklaratat e tij si para dhe gjatë fushatës elektorale, gjuha e përdorur nga Ilir Meta ishte konfrontuese dhe e nxehtë duke dalë nga ‘kostumi’ i tij i presidentit dhe rolit të ‘paqeruajtësit’ në jetën politike të vendit.
Hyseni tha se Presidenti bëri një fushatë kundër partisë në pushtet me të gjithë fuqinë institucionale të tij duke ndikuar drejtpërdrejtë në zgjedhjet.
“Kjo nuk është një ditë nderimi për shtetin, por një ditë e mirë për demokracinë dhe shtetit të së drejtës pasi ishte një proces i shëndoshjes së demokracisë”, tha Hyseni
Deputeti Spartak Braho mbështeti përfundimit e arritura, ndërsa theksoi se Presidenti ka rënë moralisht.
“Presidenti nuk ka kompetencë të jetë garant i kushtetutës, Meta ka rënë moralisht. Nuk ka funksionuar si president. Vlerësoj punën e kryer me radhë, të kryetarit, të sekretares, të nënkryetarit dhe tërë kolegëve të cilët mendoj kane qenë seriozë në punën e tyre,” tha Braho.
Vetë Presidenca këtë raport e cilësoi nul dhe antikushtetuese dhe se Ilir Meta do të përfundojë të plotë mandatin e tij deri më 24 korrik 2022, duke mos e njohur vendimin e këtij komisioni “se ka kryer shkelje të rënda të Kushtetutës”.
Sot Komisionin përmbylli punën e tij 3 javore dhe se raportin përfundimtar do ia dërgojë Kuvendit. Do të jetë në dorë të Parlamentit nëse do e votojë apo jo shkarkimin e presidentit. Në të gjithë procesin kohor të punës së Komisionit, vetë Presidenti Ilir Meta nuk ka pranuar të paraqitet edhe pse është thirrur disa herë prej tij.
Ky është komisioni i dytë i ngritur për shkarkimin e Ilir Metës, ku vendosmëria e socialistëve duket se këtë herë shkoi deri në fund.
