Përplasje mes ILD dhe Dhomës Kombëtare të Avokatëve: Deklaratat në Kuvend përgënjeshtrohen nga institucioni i avokatëve

Një kontradiktë e fortë institucionale është shfaqur mes Inspektorit të Lartë të Drejtësisë (ILD) dhe Dhomës Kombëtare të Avokatëve të Shqipërisë, pas raportimit të ILD në Komisionin Parlamentar për Nismat Qytetare, Bashkëpunimin dhe Mbikëqyrjen Institucionale.

Në raportin e paraqitur para deputetëve, ILD deklaron se, në zbatim të një rekomandimi të Komisionit, i ishte drejtuar Dhomës Kombëtare të Avokatëve me shkresën nr. 3286, datë 14 nëntor 2025, duke kërkuar propozime për problematikat që duhej të përfshiheshin në inspektimet tematike për vitin 2026. Më tej, raporti pretendon se deri në momentin e hartimit të tij nuk ishte marrë asnjë përgjigje nga Dhoma e Avokatëve.

Megjithatë, kjo deklaratë është kundërshtuar publikisht nga vetë Dhoma Kombëtare e Avokatëve.

Në deklaratën zyrtare të datës 10 korrik 2026, Dhoma e Avokatëve e cilëson të pavërtetë pretendimin për mungesë bashkëpunimi, duke theksuar se ka paraqitur vazhdimisht pranë Inspektorit të Lartë të Drejtësisë raste konkrete të shkeljeve të ligjit nga gjyqtarë dhe prokurorë, si dhe kërkesa për nisjen e procedimeve disiplinore.

Sipas Dhomës së Avokatëve, në vend që këto ankesa të trajtoheshin me hetime të plota, përgjigjet e ILD kanë qenë formale dhe burokratike, duke u kufizuar në shkresa standarde me përmbajtjen: “Kërkesa juaj u protokollua”, pa pasur transparencë mbi verifikimet apo rezultatet konkrete të ndjekjes së tyre.

Deklarata e Dhomës ngre gjithashtu pikëpyetje mbi mënyrën e raportimit të ILD para Kuvendit. Sipas saj, institucioni ka informuar Komisionin Parlamentar për kërkesa të ardhura nga Dhomat e Avokatëve të Shkodrës dhe Sarandës, ndërkohë që nuk ka bërë transparencë për masat e marra lidhur me kërkesën e Dhomës Kombëtare të Avokatëve për rastin e ndalimit të avokatit Ulian Barjami nga Prokuroria e Elbasanit.

Ky kontrast mes raportit të paraqitur në Kuvend dhe deklaratës zyrtare të Dhomës Kombëtare të Avokatëve ngre pikëpyetje serioze mbi saktësinë e informacionit të raportuar para deputetëve dhe mbi nivelin real të bashkëpunimit ndërmjet dy institucioneve.

Por debati nuk kufizohet vetëm te një shkresë.

Prej kohësh, një pjesë e konsiderueshme e avokatëve ka shprehur shqetësimin se Inspektori i Lartë i Drejtësisë nuk po ushtron në mënyrë efektive kompetencat që i jep Kushtetuta dhe ligji për hetimin disiplinor të magjistratëve. Sipas tyre, pavarësisht numrit të madh të ankesave të paraqitura ndër vite nga qytetarët dhe avokatët për sjelljen e gjyqtarëve dhe prokurorëve, rezultatet konkrete në drejtim të procedimeve disiplinore nuk kanë qenë në nivelin që pritej.

Kjo ka krijuar perceptimin se ILD po garanton një status quo, në vend që të ushtrojë një kontroll aktiv dhe efektiv mbi funksionimin e sistemit të drejtësisë. Dhoma Kombëtare e Avokatisë argumentojnë se ky perceptim nuk përputhet me realitetin që përjetojnë çdo ditë qytetarët dhe avokatët në gjykata, ku vonesat, shkeljet procedurale dhe ankesat për sjelljen e magjistratëve vijojnë të jenë objekt diskutimi.

Në këtë kontekst, përplasja mes ILD dhe Dhomës Kombëtare të Avokatëve nuk shihet vetëm si një mosmarrëveshje mbi një korrespondencë zyrtare, por si një debat më i gjerë mbi efektivitetin e mekanizmave të llogaridhënies në sistemin e drejtësisë.

Tashmë pritet që Inspektori i Lartë i Drejtësisë të japë një sqarim publik mbi deklarimet e bëra para Komisionit Parlamentar dhe mbi pretendimet e ngritura nga Dhoma Kombëtare e Avokatëve, në mënyrë që të shmanget çdo dyshim mbi transparencën dhe korrektësinë e raportimit institucional.

/Voxnews.al