“Mirë se vini, por silluni mirë”, Trump prezanton pasaportën me portretin e tij për 250-vjetorin e SHBA-së

Presidenti i Shteteve të Bashkuara, Donald Trump, prezantoi të premten një pasaportë koleksionuese me edicion të kufizuar që mban portretin e tij, e cila do të dalë në shitje në kuadër të festimeve për 250-vjetorin e nënshkrimit të Deklaratës së Pavarësisë së SHBA-së. “Pasaporta e re amerikane që thotë: ‘Mirë se vini, por silluni mirë’”, shkroi Trump në një postim në platformën Truth Social.

Pasaporta paraqet presidentin të ulur pas tavolinës së tij, me tekstin e Deklaratës së Pavarësisë në sfond dhe firmën e tij në pjesën e poshtme. Dizajni duket se është bazuar në një portret të realizuar nga fotografi i Shtëpisë së Bardhë, Daniel Torok. Në faqen e dytë të dokumentit koleksionues shfaqet një pikturë që ilustron nënshkrimin e Deklaratës së Pavarësisë në vitin 1776, e shoqëruar me mbishkrimin “United States of America 250”.

Shtëpia e Bardhë publikoi imazhin në rrjetet sociale me përshkrimin “Patriot Passport” (Pasaportë Patriotike). Sipas raportimeve, asnjë president amerikan në detyrë nuk është paraqitur më parë në një pasaportë. Nisma është pjesë e një serie veprimesh të administratës Trump për të lënë gjurmën e saj në simbolet kombëtare amerikane, ndërsa kritikët e kanë cilësuar atë si një shfaqje të kultit të personalitetit. Gjithashtu, është bërë e ditur se firma e Donald Trump do të përfshihet edhe në kartëmonedha koleksionuese, një tjetër risi e paprecedentë për një president në detyrë të SHBA-së.