Shakira shpallet e pafajshme për evazion fiskal, Spanja do t’i paguajë 60 mln € kompensim

Shakira ka marrë një fitore të madhe në gjykatë, pasi Gjykata e Lartë në Spanjë e shpalli të pafajshme për akuzat e evazionit fiskal, duke i dhënë fund një beteje ligjore që zgjati për vite me radhë.

Sipas Reuters, gjykata urdhëroi gjithashtu autoritetet spanjolle t’i kthejnë artistes mbi 60 milionë euro, përfshirë gjobat dhe interesat që ajo kishte paguar gjatë procesit.

Çështja lidhej me vitin 2011, kur autoritetet tatimore pretendonin se këngëtarja duhej të konsiderohej rezidente fiskale në Spanjë. Megjithatë, gjykata arriti në përfundimin se Shakira nuk kishte kaluar numrin minimal të ditëve të nevojshme për t’u cilësuar banore fiskale në vend.

Në reagimin e saj pas vendimit, artistja kolumbiane deklaroi se për vite të tëra ishte trajtuar si fajtore, edhe pse sipas saj “nuk kishte pasur kurrë mashtrim”. Ajo kritikoi ashpër autoritetet fiskale spanjolle dhe tha se kjo periudhë kishte ndikuar rëndë në jetën e saj personale dhe familjare.

Megjithatë, kjo nuk është hera e parë që emri i Shakirës lidhet me probleme fiskale në Spanjë. Në vitin 2023, ajo arriti një marrëveshje me prokurorët për një tjetër çështje që lidhej me taksat e viteve 2012-2014, duke pranuar të paguante miliona euro gjobë për të shmangur burgun.