Harta e re territoriale, PD ‘thërret’ për ndihmë qytetarët! Hartohet anketa, dëgjesa edhe në degët nëpër rrethe

Demokratët kanë thirrur në ndihmë qytetarët para se të shkojnë me një version final në tryezën e Komisionit të Reformës Administrative-territoriale për hartën e re.

Një anketë, është shpërndarë këtë të shtunë, ku i kërkohet qytetarëve të japin mendimin e tyre mbi versionin e ndarjes së re territoriale mbi të cilën po punohet në komisionin e Posaçëm në Kuvend.

“A jeni të kënaqur me ndarjen administrative-territoriale të vitit 2014 në bashkinë tuaj?”

“A mendoni se bashkia juaj është shumë e madhe dhe qeverisja e saj është larg qytetarëve?”

Cilin model preferoni për organizimin e bashkisë? Bashki më të vogla, apo më të mëdha?” janë disa nga pyetjet që i bën PD qytetarëve.

Kjo anketë vjen vetëm pak ditë pasi PD nxori edhe një udhëzim për ture dëgjesash që do të organizohen nga degët e saj.

Ndërsa më 31 mars përmes një tryeze që mblodhi drejtuesit e saj, kryetarë bashkish si dhe ekspertët e opozitën në Komisionin e Posaçëm për Reformën Administrative, PD prezantoi propozimet e para, për më shumë bashki, komuna malore si dhe rajone në vend të qarqeve.

Edhe socialistët kanë paraqitur 4 variante fillestare për hartën e re territoriale, e cila duhet të jetë gati brenda 2027.

/shqiptarja.com