Vajza e dhëndri i Fatmir Xhafajt, hipotekojnë 50 mijë m2 tokë shtetërore në bregdetin e Semanit, për park energjie

E kanë në ortakëri me ndërtuesin Artan Sako, vëllai i ish-kryegardistit Gramoz Sako, aktualisht kryebashkiak i Tepelenës, të cilët kanë ndëruar pallatin e Linda Ramës dhe kanë marrë rreth 170 milionë Euro tenderë gjatë pushtetit të Edi Ramës…

Rasti i çiftit Amantia Xhafaj e Ditjon Baboçi, vajza dhe dhëndri i ish-ministrit e deputetit Fatmir Xhafaj, është dëshmi e faktit, që pasuritë shtetërore po grabiten e tjetërsohen në pasuri private, nëpërmjet koncesionesh klienteliste të firmosura nga kryeministri Edi Rama.

Informacioni i ardhur në “Pamfleti”, zbulon se vajza dhe dhëndri i Fatmir Xhafajt, dy javë më parë kanë regjistruar në emër të kompanisë “Dion Energji” në kadastër, sipërfaqen 50 mijë m2 tokë bregdetare në fshatin Grykë-Topojë tek zona e plazhit të Semanit në Fier.

Kompania “DION Energji” sh.p.k. është 50% në pronësi të vajzës e dhëndrit të Fatmir Xhafajt dhe 50% në pronësi të ndërtuesit Artan Sako, vëllait të ish-kryegardistit Gramoz Sako, aktualisht kryebashkiak i Tepelenës, të cilët kanë ndërtuar pallatin e Linda Ramës dhe kanë marrë rreth 170 milionë Euro tenderë në rreth 13 vite të pushtetit të Edi Ramës.

Nëpërmjet “DION Energji” sh.p.k., çifti Amantia Xhafaj e Ditjon Baboçi dhe ortaku i tyre Artan Sako, kanë marrë koncesionin për investimin, ndërtimin dhe shfrytëzimin e Parkut Fotovoltaik në Topojë të Fierit, që ndodhet në bregdetin e plazhit të Semanit.

Sipas projektit, Këshilli Kombëtar i Territorit dhe Ujit, ka përcaktuar 35 mijë e 245 mijë m2 për ndërtimin e Parkut Fotovoltaik të familjeve ortake “Xhafaj-Sako”, por kryebashkiaku i Fierit, Armando Subashi, u ka dhënë 50 mijë m2, vendim të cilin e mban të fshehtë.

Këtë sipërfaqe buzë detit në Seman, ata e kanë marrë në përdorim me kontratë enfiteoze për 10 vite, por e kanë regjistuar në kadastër si pasuri në pronësi të tyre, kur ajo është pasuri shtetërore në administrim nga Bashkia e Fierit.

Nuk është e vështirë të kuptohet, cilët drejtues institucionesh e me çfarë urdhri sipër tyre, kanë favorizuar vajzën dhe dhëndrin e Fatmir Xhafajt e ndërtuesin Artan Sako, të regjistrojnë në pronësi të tyre, 50 mijë m2 tokë shtetërore, dhënë në përdorim për biznes energjie fotovoltaike.

Nuk është vështirë të kuptohet gjithashtu, që nga 35 mijë e 245 mijë m2 tokë caktuar për projektin e Parkut Fotovolatik, kryebashkiaku i Fierit Armando Subashi u ka dhënë 14 mijë 755 mijë m2 tokë më tepër në bregdetin e Semanit në Fier; troç për të ndërtuar vila e pallate plazhi.

Skandal i rëndë, është fakti që kryeministri Edi Rama, lejen e ndërtimit e ka dhënë në datën 25 shtator 2024 me Vendim Nr. 55; por pas 1 viti, më 25 shtator 2025, ka nxjerrë një vendim tjetër me nr. 65, për miratim të lejes me kusht, pa vendosur asnjë kusht.

Më 6 prill 2023, rreth 30 muaj para dhënies së lejes së ndërtimit nga Këshilli Kombëtar i Territorit, ortakët Xhafaj e Sako, kanë nënshkruar me Drejtorinë e Koncesioneve në Ministrinë e Infrastrukturë-Energjisë, kontratën për ndërtimin e Parkut Fotovoltaik.

Mbi 3 vite para lejes së ndërtimit, konkretisht më 28 qershor 2022, kanë nënshkrua Marrëveshjen Nr. 6359/2 me OSSH, për linjën e furnizimit me emergji elektrike të zonës së Parkut Fotovolatik.

Me Vendim Ndikimi në Mjedis të datës 13 nëntor 2024, rreth 1 vit para daljes së lejes, Agjencia Kombëtare e Mjedisit, i pajisi me leje mjedisore për ndërtimin Parkut Fotovoltaik në bregdet, me raportin sikur nuk dëmton mjedisin.

Kështu veprohet, kur përfituesit e koncesioneve janë familjarë e klientë të afërt të kupolës së pushtetit./Pamfleti