Protesta e opozitës, reagon Delegacioni i BE-së: Distancohuni nga dhuna, e pajustifikueshme!

Delegacioni i Bashkimit Evropian në Tiranë ka reaguar lidhur me protestën e fundit të opozitës, duke theksuar rëndësinë e respektimit të të drejtës për tubim paqësor dhe distancimin nga çdo formë dhune.

Në një përgjigje për “News24”, delegacioni rikujtoi se liria e tubimit është një e drejtë themelore.

“Të gjithë kanë të drejtën e lirisë së tubimit paqësor, siç parashikohet në Kartën e të Drejtave Themelore të BE-së”, thuhet në reagim.

Megjithatë, përfaqësuesit e BE-së dënuan përdorimin e dhunës gjatë protestave, duke theksuar se ajo nuk mund të justifikohet.

“Përdorimi i dhunës nuk mund të justifikohet për asnjë arsye dhe të gjithë aktorët duhet të distancohen prej saj”, thkesoi më tej.

Delegacioni vuri në dukje gjithashtu rolin e opozitës në funksionimin e demokracisë, duke theksuar rëndësinë e angazhimit të saj në parlament dhe në proceset reformuese të vendit.

Reagimi i plotë:

Delegacioni i BE-së në Tiranë rithekson se të gjithë kanë të drejtën e lirisë së tubimit paqësor, siç parashikohet në Kartën e të Drejtave Themelore të BE-së.

Përdorimi i dhunës nuk mund të justifikohet për asnjë arsye dhe të gjithë aktorët duhet të distancohen prej saj.

Delegacioni i BE-së rikujton se opozita ka një rol të rëndësishëm për të luajtur në parlament dhe në jetën demokratike të vendit, përfshirë dhe veçanërisht në kontekstin e reformave themelore.

/pamfleti