Ky është 10-vjeçari që bëri histori në Javën e Modës në Paris

Në industrinë e modës zakonisht duhen shumë vite përvojë për të arritur sukses të madh. Megjithatë, një djalë vetëm 10 vjeç ka arritur të tërheqë vëmendjen e gjithë botës. Max Alexander ka hyrë në histori si stilisti më i ri që ka prezantuar koleksionin e tij në Javën e Modës në Paris.

Max filloi të krijonte rroba që në moshën katër vjeç. Edhe pse ishte shumë i vogël dhe ende nuk shkruante mirë, ai kishte shumë imagjinatë dhe dëshirë për të eksperimentuar me pëlhura të ndryshme. Ai krijonte rroba për kukulla dhe manekina të vegjël, ndërsa familja e tij e mbështeti vazhdimisht pasionin e tij. Kjo mbështetje bëri që talenti i tij të zhvillohej shumë shpejt.

Në vetëm pak vite, Max kishte krijuar mbi 150 dizajne të ndryshme. Ai madje fitoi edhe një rekord botëror Guinness si stilisti më i ri që ka organizuar një sfilatë mode. Pavarësisht moshës së tij të vogël, ai ka bashkëpunuar me modelen e njohur Coco Rocha dhe disa nga krijimet e tij janë veshur edhe nga aktorja e famshme Sharon Stone.

Një nga momentet më të rëndësishme të karrierës së tij ishte prezantimi i koleksionit Vjeshtë/Dimër 2026–2027 në Javën e Modës në Paris. Në këtë sfilatë ai prezantoi 15 krijime të ndryshme, të frymëzuara nga lulet, imagjinata dhe ideja që moda mund të ndryshojë përmes kreativitetit dhe përdorimit të materialeve të ricikluara. Koleksioni i tij u vlerësua jo vetëm për stilin e veçantë, por edhe për mesazhin ekologjik që përcillte./Tema