Putin propozon Moskën si vendtakim për samitin me Zelenskyn

Presidenti rus, Vladimir Putin, ka sugjeruar Moskën si vendin ku mund të mbahet samiti i shumëpritur me homologun e tij ukrainas, Volodymyr Zelensky. Kjo lëvizje vjen në një kohë kur shtohen përpjekjet diplomatike për të gjetur një zgjidhje paqësore për konfliktin e gjatë mes dy vendeve.

Ndërkohë, si një alternativë për këtë takim, po përmendet gjithnjë e më shumë Gjeneva. Presidenti francez Emmanuel Macron ka propozuar që samiti të mbahet në një “vend neutral”, me Zvicrën dhe më konkretisht Gjenevën në krye të listës. Macron, pas vizitës së tij në Shtëpinë e Bardhë, tha për mediat franceze se “kjo nuk është thjesht një hipotezë, por vullneti kolektiv i udhëheqësve”.

Ministri i Jashtëm zviceran, Ignazio Cassis, e ka konfirmuar këtë opsion duke shprehur gatishmërinë e Zvicrës për të mikpritur takimin. Ai theksoi rëndësinë e rolit të veçantë të Gjenevës si selia evropiane e Kombeve të Bashkuara, duke shtuar se Zvicra është mirënjohëse për besimin që i është dhënë.