“Meta rrezikon minimumi 15 vite burg” – Avokati zbardh skenarët: Për lobimin në SHBA, mund të fajësojë Monikën

Juristi Romeo Kara tha se kreu i Partisë së Lirisë Ilir Meta, mund të fajësojë Monika Kryemadhin për lobimin e LSI në SHBA.

Ai u shpreh gjithashtu se Ilir Meta ka folur në seancë, ndryshe nga Kryemadhi, e cila ka vendosur të heshtë. Kara tha se për dosjen “CEZ DIA”, shumë shpejt mund të kemi komunikimin e akuzës ndërsa shtoi se Meta rrezikon minimumi 15 vite burg.

“Mendoj që është çështje në hetim. Këto takime dhe seanca pyetjesh janë normale. Sigurisht që e paskan që të flasin atje, mund të kishte bërë si bashkëshortja e tij. Meta ka qenë në diskursin e tij të mëparshëm, që ai ka folur dhe Monika jo. Logjika më thotë që mund të kemi shkarkim përgjegjësish. U mundua ta përdorë si kartë politike. Fakti që thotë, unë kam folur dhe Monika nuk ka folur, duke pasur parasysh edhe deklarimet e mëparshme, mendoj se mund të kemi rast të tillë.

Duke parë materialin që u ofrua nga prokuroria, ata janë shprehur se zotëria i ka kryer këto vepra penale. Mendoj se jemi afër komunikimit të akuzës. Unë them minimumi 15 vjet. Unë e kam kallëzuar Berishën bashkë me Metën, Berisha ka qenë në dijeni”, tha ai.