Në dosjen e SPAK për korrupsionin e Familjes Berisha dalin në pah lidhje të tjera të Familjes me fije të kupolës së sistemit të drejtësisë, familjen e Enver Hoxhës dhe figura të korrupsionit të pandëshkuar.
Sipas dosjes së SPAK, çifti Jamarbër Malltezi dhe Argita Berisha kanë financuar me para korrupsioni fondacionin e Liri Berishës ‘Fëmijët Shqiptarë’.
Pra, një pjesë e parave të korrupsionit të Familjes Berisha me pasuritë publike, në rastin konkret me tjetërsimin e pronës publike ish Klubi Partizani, janë qarkulluar dhe ‘shpëlarë’ nga fondacioni i Liri Berishës, përmes Bordit.
Është bordi organi që ka tagrin për menaxhimin e donacioneve.
Pjesë e bordit të fondacionit të Liri Berishës ‘Fëmijët Shqiptarë’ është edhe Ariel Çomo, vëllai i kryetarit të Kolegjit të Posaçëm të Apelimit, Sokol Çomo (shkalla e dytë dhe e fundit e Vetingut).
Edhe pse pa të drejtë vote, Ariel Çomo është pjesë e bordit të fondacionit dhe kjo mund të jetë arsye se pse Sali Berisha nuk e përmend kurrë emrin e Sokol Çomos në ballkonin që nuk lë njeri pa baltos dhe përgojuar.
Anëtar bordi është edhe Genc Boga, burri i mbesës së Enver Hoxhës, por ky fakt duket i natyrshëm pasi Sali Berisha ka qenë i besuar i familjes së diktatorit, duke i ngarkuar punë deri te shkundja e tapetave.
Pjesë e bordit të fondacionit të Liri Berishës ‘Fëmijët Shqiptarë’ është edhe Flutura Kola, gjithashtu pjesë e dosjes së SPAK si e besuar dhe bashkëpuntore e Argita Berishës në raportin e saj korruptiv me Damir Fazlliç.
Nga përbërja e bordit duket qartë se kemi të bëjmë me një rreth të mbyllur dhe një instrument me natyrë mafioze në duart e Familjes Berisha, non grata nga SHBA dhe Britania e Madhe si e korruptuar, si dhe nën akuzë nga SPAK për korrupsion dhe pastrim parash.
Vilë në Farkë
SPAK po heton fondet dhe pasuritë e paluajtshme të Fondacionit për Fëmijët Shqiptarë, organizatës joqeveritare të themeluar nga Liri Berisha.
Hetimi po prek edhe fondet e investuara për blerjen e një vile të Fondacionit në zonën e ish-liqenit të Farkës e cila përdoret si seli e biznesit.
Po me çfarë parash e ka blerë Liri Berisha vilën në Farkë?
Nëse Argita kishte vedosur traun për çdo biznesmen që kërkonte të zgjidhte ndonjë hall në qeveri, duke i marrë 3 %, nëse Shkëlzeni kishte legalizuar punën e sekserit duke deklaruar qindra mijëra euro që u merrte biznesmenëve për t’u mbaruar punë te babai kryeministër dhe nëse dhëndri Jamarbër Malltezi u vinte syrin tokave në Tiranë dhe i kthente në sheshe ndërtimi me firmën e vjehrrit kryeministër, Liri Berisha përdori fondacionin e saj dhe emrin e madh Nënë Tereze për t’u marrë haraç biznesmenëve për firmën e burrit të saj kryeministër, i cili u kishte kaluar para dhe pasuri publike në vlerë qindra milionë euro.
Vetëm gjatë mbrëmjes së 13 tetorit 2012, një rreth biznesmenësh, të cilët favorizoheshin nga qeveria Berisha, i paguan Liri Berishës mbi gjysmë milioni euro. Paratë kalonin përmes bankës së Familjes, Intesa San Paolo Bank, e cila i dha Shkëlzenit 1.8 milionë euro kredi me kolateral fiktiv për të ngritur fabrikën e boronicave në Gërdec.
Biznesmenët hynë në garë duke blerë gjoja në ankand piktura modeste dhe mediokre, me vlera të mëdha, si kontribute për fondacionin e zonjës Liri Berisha për fëmijët autikë, por paratë, pasi kalonin në një mekanizëm jo transparent, dyshohet se përfundonin në xhepat e Argitës dhe Shëlzenit, duke i investuar në pasuri të paluajtshme.
