Ja kush është i penduari i SPAK-ut që po fundos Ilir Metën, kreu i PL e quan ordiner dhe ia hedh fajin Berishës

Kreu i Partisë së Lirisës, Ilir Meta ka dëshmuar për rreth 3 orë ditën e sotme në SPAK në lidhje me aferën CEZ-DIA, e cila u rihap në prill të vitit të kaluar.

Pas daljes nga godina e SPAK, në një prononcim për mediat, Meta u shpreh se nuk ekziston asnjë akt, asnjë dokument që ai në çfarëdolloj detyre të ketë favorizuar këdo.

Por, Elvis Mata, një ish drejtor në DIA, kompania e Kastriot Ismailajt mund të jetë “çelësi” i zbardhjes së kësaj afere. Burime bëjnë me dije se ai mund të jetë bërë bashkëpunëtor i drejtësisë.

Elvis Mataj, ky që shihni në foto ka qenë kryetar i LRI-së dhe i besuar i Ilir Metës. Meta dyshohet se e kishte vendosur Matën drejtor ekzekutiv në kompaninë DIA.

Meta deshi të dëshmonte edhe në vitin 2016, por u sabotua.

Meta e pranoi se Elvis Mata ka qenë pjesë e LRI-së, por e konsideroi atë një mashtrues ordiner.

“Prokurori, apo personi i autorizuar që më pyeti, mund t’ju them se përgjigjen më të shkurtër e kam dhënë për këtë person, mashtrues, të përzënë nga LRI që në 2004-2005 (Elvis Mata). Kushdo që ka probleme me drejtësinë, mund të marr status. Është i autorizuar SPAK që ta përdorë përgjigjen time, gjithçka është mashtrim ordiner. Këtu janë mal dosjet dhe kallëzimet e bëra, edhe nga unë. Për mld euro që i kushtojnë qytetarëve shqiptarë dhe shumë të tjerëve dëme. Ju ftoj që të bëni pyetje.”, tha Meta.

Për dosjen e CEZ-DIA është dënuar Kastriot Ismailaj në vitin 2017 me 11 vite burg për “mashtrim me pasoja të rënda” dhe “pastrim të produkteve të veprës penale”.

Gjykata ka urdhëruar edhe sekuestrimin e 5 milionë eurove.

Ai ishte administrator i kompanisë DIA, e ngarkuar për mbledhjen e borxheve të CEZ, ku u përfshi në një skemë mashtrimi, duke shkatërruar edhe raportet mes shtetit shqiptar dhe CEZ, me kosto të madhe për buxhetin e shtetit.

Meta dyshohet se është koka e aferës CEZ-DIA. Por, sot Ilir Meta fajësoi Sali Berishën që kishte kryer shitjen e OSSH tek CEZ-i.