Zgjedhjet lokale të 2023, Gjiknuri: 40 bashki i kemi të sigurta, mund të fitojmë më shumë

Sekretari i Përgjithshëm i PS-së, Damian Gjiknuri teksa ndodhet në një konferencë për gazetarët u pyet dhe në lidhje me kandidaturat për zgjedhjet vendore të 14 Majit.

Kur u pyet nëse Benet Beci do të jetë kandidat i PS-së për Bashkinë e Shkodrës, ai tha se do të ishte një “emër i përshtatshëm”.

“Mund të ketë shumë deputetë që do të donin që të konkurronin si kryetar bashkie, Beneti është një kandidaturë e mirë do i bënte nder Shkodrës. Nuk po konfirmoj që do të jetë Beneti pasi do t’i nënshtrohen një procesi konsultim brenda partisë por do t’i bënte nder Shkodrës”.

Gjiknuri tha se priste që partia Socialiste të fitonte jo më pak se 40 bashki në zgjedhjet e ardhshme lokale. Ai tha se nuk përjashtohej mundësia që të fitonte edhe më shumë bashki, pasi alternativa përballë PS nuk ngjallte besim tek qytetarët.

“Nuk zbresim nën 40 bashki, kjo nuk diskutohet. Shifra mund të jetë edhe më e lartë por varet nga dinamika dhe organizimi ynë. Duke parë qeverisjen dhe trashëgiminë lektorale dhe alternativën përballë dalim natyrshëm në këtë përfundim.

Edhe ju edhe pse nuk doni ta pranoni këto janë llogaritë elektorale kur nuk ke asnjë alternativë tjetër përballë. Alternativa e besueshme mund të kthente kahje, por këtu kemi të njëjtët njerëz që nuk kanë asnjë bagazh pozitiv të qeverisjes së tyre”-tha Gjiknuri.