Importi i bananeve në Shqipëri nga kompanitë e frutave, të cilat kanë pushtuar televizionet me reklama, duket se janë linja kryesore e trafikut të kokainës. Pas kapjes mbrëmjen e djeshme të 119 kg kokainë nga policia, qëndron kompania Zico e Trifon Meratajt. Kompania reklamon produktet e Bana King, sidomos në TV Klan nga Ardit Gjebrea. Bëhet fjalë për reklamat e famshme ku shfaqen fëmijë me banane në Dorë. Ky biznes drejtohet nga kapot e drogës nga Dubai.

Versioni i policisë

Në njoftimin zyrtar të policisë, thuhet se konteineri ka kaluar tranzit në një port në Itali, ku autoritetet ligjzbatuese italiane kanë konstatuar mungesën e plumçes (vulës), për këtë arsye kanë ushtruar kontroll dhe kanë konstatuar mungesë të arkave me banane. Pas këtij konstatimi kanë mbyllur dhe riplumbosur kontenierin, duke e shoqëruar me procesverbalin përkatës.

Më pas kontejneri ka mbërritur në portin e Durrësit dhe pas veprimeve të zhdoganimit dhe kontrollit në skaner ka rezultuar i pastër dhe ka dalë nga porti, me destinacion magazinat e firmës në periferi të Tiranës.

Përgjatë rrugës nacionale Durrës-Tiranë, në vendin e quajtur Romanat, kamioni që transportonte kontenierin është ndaluar nga persona ende të paidentifikuar, të cilët për disa minuta kanë ushtruar kontroll në kamion dhe

kontenierin me banane dhe më pas janë larguar me shpejtësi pas kontrollit të kontenierit. Për këtë situatë, përfaqësuesit e firmës importuese të bananeve kanë njoftuar Policinë e Shtetit.

Detajet në media

Nga ana tjetër, në media janë publikuar detaje të tjera,

Sipas gazetares Klodiana Lala, kontejneri me banane ishte porositur nga kompania Ziko e Bana King, dhe ka ardhur nga Ekuadori në Itali, në Goia Toauro, ndërkohë që autoritetet italiane nisën dyshimet pasi konstatuan se mungonte plumbçia, që mbyll ngarkesën.

Policia ka dyshime të forta se brenda konteinerit me banane që vinte nga Ekuadori fshihej një sasi kokaine shumë më e madhe krahasuar me atë që u kap në Durrës.

Sipas raportimeve në media gjithçka ka nisur në një nga portet e Ekuadorit.

“Ziko Kompani”, e cila importon banane nga Amerika Latine kishte bërë porosinë e radhës.

Krahas bananeve, në konteinerin frigoriferik ishte futur edhe një sasi e madhe lënde narkotike kokainë. Grupet kriminale kanë ndjekur rrugëtimin disa javor të konteinerit nga Ekuadori për në portin Gioia Tauro në Itali.

Konteineri është hapur pikërisht në këtë port dhe fillimisht ndërhyrja është konstatuar nga autoritetet e portit, të cilët njoftuan policinë se kishte ndodhur një vjedhje e arkave me banane nga konteineri me destinacion Shqipërinë.

Pas verifikimit të procesverbalit të nisjes dhe konstatimit të arkave me banane prezente, policia ka bërë një procesverbal tjetër ku ka shënuar se konteineri u gjet i hapur, pa plumbçen që shërben si vulë dhe se nga ai ishin vjedhur një sasi e madhe bananesh pa bërë fjalë për lëndë narkotike.

Dyshohet se sasia e madhe e bananeve, të cilat janë hequr nga konteineri janë kokainë e vjedhur nga një grup kriminal, i cili kishte dijeni për prezencën e saj aty.

Kush është Bana King

“Bana King”, është një ndër më të reklamuarat në mediat shqiptare, produkt i Zoko Kompani.

Një ndër personazhet meditiakë, moderator Ardit Gjebrea i kushton jo pak hapësirë mediatike reklamimit të frutave të kësaj kompanie.

Reklamat në një ndër emisionet më të ndjekura, tregon qartë milionat e hedhura nga kjo kompani në media.

Por, mesa duket dardha e ka bishtin prapa.

Përtej importit të bananes, dyshohet se fshihet një tjetër biznes, milionat e të cilit shtrihen edhe në media.

Biznese që komandohen nga zyrat në Dubai, dhe që vinë e “korrin suksese” të mëdha në Shqipëri.

Lënda narkotike e kapur mbrëmjen e djeshme, çon në dyshimë të forta se pas biznesit të importit të bananeve, fshihet ai i kokainës. Këtë pritet ta sqarojnë hetimet.

Nga reklama me majmunë e banane përfundojnë të kapura me kokainë, ndërsa media e kalon në heshtje dhe askush si thotë emrin.

Nga ana tjetër policia në njoftimin zyrtar, thotë vetëm “është kapur kokainë në kontejnerin e një kompanie importi”, por mesa duket vetëm në Shqipëri ndodh që firmave ju kapin drogë në kamiona, dhe askush nuk di asgjë.

Askush nuk mban përgjegjësi, si ngrihen e fryhen këto kompani, Cilat janë burimet e financimit?

Si rriten me shpejtësi të madhe e zaptojnë tregjet?

Droga në banane

Kujtojmë këtu se ky nuk është rasti i parë, ku është kapur sasi lëndë narkotike në kontejnerët me banane.

Janë edhe të paktën gjashtë raste të tjera, ku është sekuestruar lëndë narkotike në kontejnerët me banane.

Në 12 tetor 2021, Task Forca permanente e krijuar në portin e Durrësit gjeti 10 kilogramë të fshehura në pjesën e motorëve frigoriferikë.

Në 7 shtator, u kap një tjetër sai, me rreth 8 kilogramë.

Ndërkohë më herët, në 13 korrik në Portin e Durrësit u sekuestruan 12 kilogramë kokainë, ndërsa më 23 korrik u gjetën 7 kilogramë të tjera.

Më 29 korrik 2021 kompanisë iu gjetën dhe u sekuestruan 7 kilogramë kokainë po në vijim të operacionit “Rada”.

Por, edhe pse rastet vijojnë, mesa duket milionat i kanë “mbyllur gojën” edhe mediave.

Të arrestuar

Nën drejtimin e hetimeve nga Prokuroria e Tiranës u arrestuan 2 shoferët e automjeteve të firmës, Gëzim Kalaja 31 vjeç dhe Hasan Salihu 63 vjeç dhe drejtori i tregtisë së firmës së bananeve të import-eksportit me vendet e Amerikës Latine, Marson Murataj, 34 vjeç. Pas tyre qëndron Trifon Murataj si administrator dhe pronar i kompanisë. Por, sigurisht që pas Muratajt qëndrojnë personazhe të tjerë, por si gjithmonë policia dhe prokuroria nuk e ndjekin deri në fund ngarkesën.