Në varfëri ekstreme, familja afgane shet vajzën për 500 dollarë: Ishim të detyruar, fëmijët tjerë po vdesin urie

Afganistani po përballet me krizën më të madhe humanitare në botë, me një përkeqësim të mprehtë të situatës që kur talebanët morën pushtetin në gusht.

Fondet ndërkombëtare që mbështetën ekonominë e brishtë të vendit janë ndalur ndërsa bota debaton se si të merret me regjimin taleban.

Kombet e Bashkuara kanë lëshuar një paralajmërim të ashpër se miliona afganë do të vdesin nëse ndihma urgjente nuk arrin së shpejti në vend.

Në një video, Yogita Limaye e BBC-së udhëton në Herat, ku ka takuar një familje, e cila është detyruar që të shesë fëmijën e saj për 500 dollarë.

Nënë e cila ka shitur vajzën e saj disa muajshe, është shprehur se ishte e detyruar pasi në këtë mënyre mund të ushqente fëmijët e tjerë.

“Fëmijët e tjerë po vdesin urie, prandaj u detyruam që të shisnim vogëlushen tonë. Jam shumë e mërzitur, do doja mos isha e detyruar që të shisnim fëmijën tonë” tha nëna e vajzës.

“Po vdesim urie. Nuk kemi as miell dhe as vaj. Nuk kemi asgjë. Vajza ime nuk mund ta dijë se çfarë e priste. Nuk e di sesi do të ndihet ajo, por ishim të detyruar ta bënim këtë gjë” tha babai i vajzës.