Policia e Tiranës ka arrestuar kandidatin për deputet të LSI-së në zgjedhjet e 25 prillit, Etion Joka, i cili akuzohet për korrupsion aktiv në zgjedhjet parlamentare të 25 prillit.
Etion Joka u denoncua me video në emisionin “Breaking” në TopNews dhe ishte në kërkim nga policia deri më sot.
Ish kandidati Joka është filmuar në një video duke premtuar para për blerjen e votave në Tiranë. Ai u shfaq me zë në videon e publikuar nga emisoni Breaking, teksa i jep 100 dollarë një qytetari që ishte angazhuar të mbledhë vota për LSI-në. Po ashtu në të njëjtën video, një person i quajtur Edison Babo vijonte pazaret ku premtonte punësim për qytetarin pas zgjedhjeve.
Njoftimi i policisë:
“Nga specialistët për Hetimin e Korrupsionit u bë ekzekutimi i vendimit penal, për shtetasin E. J, 32 vjeç, pasi Gjykata e Posaçme Kundër Korrupsionit dhe Krimit të Organizuar, ka caktuar në mungesë masën e sigurisë “Arrest në burg”, për veprën penale “Korrupsioni aktiv në zgjedhje”, thuhet në njoftim.
Si ndodhi skandali i publikuar në “Breaking” në TopNews:
Teksa na ndajnë vetëm dy ditë nga zgjedhjet e 25 Prillit, emisioni “Breaking” në Top News, ka transmetuar një video ekskluzive, ku shfaqet një kandidat i Lëvizjes Socialiste për Integrim duke blerë vota.
Më poshtë pjesa e parë e bisedës së kandidatit të LSI-së:
Qytetari: Edhe do organizojmë një vend në lokal
Etjon Joka: Me shumë, shumë, shumë kujdes.
Qytetari: Po çe vret mendjen o burrë
Etjon Joka: Ato që ke për të lëviz me mi lëviz. Me mi lëviz. Me mi respektu njerëzit… Me mi respektu njerëzit
Qytetari: I kam respektu sa kam pas mundësi. Jemi ulur gjithandej, ça kam pas mundësi
Etjon Joka: Hajde një sekondë (dalin jashtë). Te puna si të ka shkuar? Të ka ecur çik?
Qytetari: Po mirë ka ecur mashalla, s’ka qenë keq. Për Zotin, jam duke bërë maksimumin.
Etjon Joka: Ma jep dorën (i jep 10.000 lek), ma bë një drekë se unë s’vi dot.
Qytetari: Po mirë më se ja jap…
Etjon Joka: Çfarë të duhet në telefon… Një votë po ma humbe se nuk ma thua, më ngel hatri. Se nuk më duhet kjo lëvizje. Për çdo gjë. Për veten tonë e kemi.
Qytetari: Kam aty ca pleq, çfarë nderi mund ti bëjmë atyre? Ia bona muhabetin atyre. O xhaje i thashë unë, tu jap një kafe të mirë… Të vimë t’ju marrim me makinë ditën e votimit.
Etjon Joka: Mos ngre zërin, se kemi kontrolle nga të gjitha anët.
Qytetari: Të vimë t’ju marrim me makinë ditën e votimit. T’ju vi t’ju jap atë kafen, dash para dash mbrapa, na jepni ato votë që na duhet, dhe na lë rehat. O Xhaje kështu na thoni të gjithë ne. O xhaje unë të them djalë konkrete. Ti japim gjërat në dorë dhe mirupafshim. Të jap lekët dhe mbaro punë, ti merr lekët dhe më jep atë votën që më duhet…dhe jena rehat të dy. Si mendon?
Etjon Joka: Fiks, fiks, fiks. Mendoje vetë.
Qytetari: A mendon se jam në rregull te rruga e drejtë apo jo tek kjo pjesë?
Etjon Joka: Për këtë linjë më dëgjo mua, hiqe telefonin… asnjë lloj telefoni, në telefon vetëm qef.
