Mbyllet protesta për rritjen e çmimeve, qytetarët kanë katër kërkesa për qeverinë, ja kur do të mblidhen sërish

Është mbyllur protesta e mbajtur ditën e sotme përpara Kryeministrisë kundër rritjes së ccmimeve të energjisë elektrike, ushqimeve të shportës bazë, si edhe naftës dhe gazit.

Protesta nisi në orën 17:00 dhe zgjati mbi një orë. Ajo ishte organizuar nga qytetarë të thjeshtë dhe politikanët nuk ishin të mirëpritur.

Qytetarë të ndryshëm kanë mbajtur fjalën e tyre në këtë protestë, ku thelbi ishte marrja e masave për moslejimin e ngritjes së ccmimeve.

Në fund, një nga protestuestit renditi katër kërkesa për qeverinë:

-Ne propozojmë heqjen e TVSH për ushqimet e shportës.

-Kërkojmë uljen e TVSH-së në masën 10% të çmimit të energjisë për bizneset e vogëla dhe familjet.

-Heqjen e taksës së qarklullimit në naftë.

-Heqjen e akcizës së gazit.

Fjalën e mori dhe aktivisti Adriatik Lapaj, i cili lajmëroi se ata do të mblidhen sërish ditën e hënë në orën 17:00.

“Ditën e hënë në orën 5 do jemi këtu përsëri. Ndoshta bëhemi më shumë se sot ditën e hënë. Ku i dihet”, u shpreh Adriatik lapaj.