Plagosi 4 persona, mes tyre 2 fëmijë, pranga shoferit 23 vjeçar në Fushë-Krujë

Policia e Durrësit ka vënë në pranga një 23 vjeçar, pasi u bë shkaktar i një aksidenti të rëndë në aksin rrugor Fushë Krujë- Tapizë, ku mbeten të plagosur 4 persona.

Policia njofton se është prangosur i riu A.V., 23 vjeç, banues në Fushë Krujë, pasi ditën e djeshme, në segmentin rrugor Fushë Krujë- Tapizë, duke drejtuar mjetin tip “Benz”, është përfshirë në aksident rrugor me mjetin tip “Opel”, me drejtues shtetasin A. D. dhe mjetin tip “Jeep”, me drejtues shtetasin I. T.

“Për pasojë janë lënduar shtetasit M. D., 32 vjeçe dhe një fëmijë 7-muajsh, pasagjerë në mjetin tip “Benz”, dhe V. H., 47 vjeç dhe një fëmijë 1 vjeç, pasagjerë në mjetin tip “Opel”, banues në Fushë Krujë, të cilët ndodhen nën kujdesin e mjekëve.”, bën me dije policia.

Materialet i kaluan Prokurorisë së Rrethit Gjyqësor Durrës, për veprime të mëtejshme.