Sot njihet me masën e sigurisë, zbardhet DËSHMIA e sanitares që zhvati 8 mln lekë duke u shtirur si infermiere: Jam e tronditur, do flas një herë tjetër.
Tire Alldervishi, sanitarja e tmerrshme që u shtir si infermiere dhe zhvati tetë milionë lekë nga vajza e një zonje të infektuar nga Covid-19, e cila më pas ndërroi jetë, do të njihet sot me masën e sigurisë. Një ditë pas arrestimit të saj, sanitarja do të dalë para trupit gjykues, ku do të mësojë fjalën e togave të zeza.
Alldervishi në dëshminë e saj as nuk ka mohuar dhe as nuk ka pohuar përfshirjen e saj në skandalin e denoncuar dy ditë më parë në emisionin “Stop”. Ajo mësohet të jetë shprehur përpara hetuesve se është e tronditur, por që do të flasë në një moment të dytë në lidhje me ngjarjen.
“Nuk kam asgjë për të thënë jam e tronditur, do flas në një moment të dytë,”– mësohet të ketë thënë Alldervishi para hetuesve.
Sanitarja u vu në pranga një ditë më parë, ndërkohë që katër persona të tjerë janë pjesë e stafit të spitalit “Shefqet Ndroqi” janë vënë në hetim, pasi dyshohet se kanë bashkëpunuar me të.
Ngjarja e rëndë u denoncua dy netë më parë në emisionin ‘Stop”, nga vetë vajza e gruas që ndërroi jetë nga Covid-19.
Vajza e një 55-vjeçareje, e cila humbi betejën me Covid pas 28 ditësh luftë me këtë sëmundje, është mashtruar nga sanitarja pasi kjo e fundit i është hequr si infermiere dhe është ofruar që në këmbim të vlerave monetare t’i kuronte të ëmën.
Fakti më i rëndë dhe makabër ishte se sanitarja i hiqte bukën nga tavolina të sëmurës me covid.
