‘E shpallëm shtet sponsor të terrorizmit’, Rama: Teherani na sulmoi pas strehimit të opozitës iraniane, sot kemi mbrojtje më të fortë kibernetike

Kryeministri Edi Rama mori pjesë në samitin Shqipëri-Izrael, ku u bënë bashkë rreth 40 kompani inovative izraelite me fokus sigurinë kibernetike dhe zhvillimin teknologjik të Shqipërisë dhe rajonit. Në fjalën e tij, Rama vlerësoi marrëdhëniet mes dy vendeve, duke theksuar lidhjet historike mes dy popujve.

Ai u ndal edhe tek sulmet kibernetike iraniane ndaj Shqipërisë, duke i lidhur ato me strehimin që Tirana u dha mijëra iranianëve të opozitës. Sipas tij, regjimi iranian reagoi ndaj këtij veprimi duke sulmuar infrastrukturën digjitale shqiptare dhe sistemin e shërbimeve online të ndërtuar ndër vite.

“Për mua është gjithnjë lajm shumë i mirë kur një hebre vjen në vendin tonë dhe sa më shumë aq më mirë. Falënderoj të gjithë të përfshirët në këtë organizim jo të lehtë, sepse sa më shumë e njoh Izraelin, kuptoj se të bësh kaq shumë izraelitë bashkë, nuk është aspak e lehtë.

Ju falënderoj që keni ardhur dhe keni ofruar dijen tuaj në këtë rrugë që sapo kemi nisur në teknologji dhe digjitalizim. Përmes teknologjisë ne mund të bëjmë gjëra që vende të mëdha më të zhvilluara dhe të suksesshme, e kanë të vështirë t’i bëjnë në mënyrat e vjetra.

Një mik i imi më thoshte se vendet nuk dallojnë sipas asaj që kanë, por sipas asaj që dinë dhe Irzaeli është një shembull i kësaj. Kjo e jona është një histori e krijuar në kohët më të errëta për popullin hebre. Shqipëria ishte vendi i vetëm në Europë që kishte më shumë hebrenj pas luftës, se para saj.

Kjo falë myslimanëve të Shqipërisë, që morën hebrenjtë në shtëpi dhe rrezikuan jetën për ta. Kjo është një histori që ne duhet ta trashëgojmë brez pas brezi dhe t’ia rrëfejmë fëmijëve. Kjo për të dhënë një shembull sesi duhet të tregohemi me të tjerët edhe në kohët e sotme.

Ne ju hapëm derën disa mijëra iranianëve, që janë në opozitë. Nuk e bëmë për arsye politike, apo që të luftonin regjimin nga këtu, por sepse jetët e tyre ishin në rrezik dhe askush nuk donte t’i shpëtonte. Ne i hapëm dyert, i hapëm strehë dhe bëmë marrëveshje që ata të jetojnë këtu dhe të rritin fëmijët e tyre.

Kjo erdhi me hakmarrje nga regjimi iranian, që nuk e duronte këtë dhe na sulmoi tek ajo që kishim ndërtuar për vite të tëra për t’i shërbyer qytetarëve shpejt, me transparencë, pa korrupsion dhe pa tarifa.

U bëmë vend që 95% të shërbimeve e bëmë online dhe ata na sulmuan për të na kthyer pas në kohën e errët të shërbimeve publike në nivelin më të ulët. Qemë shumë mirënjohës që Izraeli, SHBA dhe disa vende nga Emiratet na ndihmuan t’i mbijetojmë këtyre sulmeve”, tha Rama.