Paralajmërimi: Biletat e avionëve do të arrijnë nivele rekord!

Ekspertët paralajmërojnë se çmimet e biletave të avionëve mund të arrijnë nivele rekord në muajt e ardhshëm për shkak të tensioneve në tregun global të energjisë. Situata lidhet me vështirësitë në furnizimin me naftë dhe gaz përmes Ngushticës së Hormuzit.

Gjatë një seance dëgjimore në Komitetin e Thesarit në Parlamentin britanik, ekspertja e tregjeve të energjisë Amrita Sen, themeluese e kompanisë Energy Aspects, e përshkroi situatën si një nga ndërprerjet më të mëdha në historinë e tregut të energjisë.

Sipas saj, edhe pse kriza nuk është ende në nivelet e rritjes së çmimeve të vitit 2022 pas pushtimit të Ukrainës nga Rusia, sektori më i goditur aktualisht është karburanti i avionëve. Ajo theksoi se një pjesë e madhe e prodhimit të këtij karburanti realizohet në Lindjen e Mesme dhe në Azi, ndërsa gjetja e burimeve alternative është e vështirë.

Rreziku për transportin detar në Ngushticën e Hormuzit ka ndikuar në qarkullimin e naftës bruto, duke prekur drejtpërdrejt prodhimin e karburantit për aviacionin. Si pasojë, ekspertët presin që çmimet e biletave të avionëve të rriten ndjeshëm dhe kjo situatë mund të zgjasë për disa muaj.