Atentati i Rinasit me dy viktima, dosja i kalon SPAK-ut për dyshime për grup të strukturuar kriminal

SPAK merr në dorë hetimin për atentatin e ndodhur në nëntor 2025 në rrethrrotullimin e Rinasit, ku mbetën të vrarë dy persona, pas një vendimi të Prokurorisë së Tiranës për shpallje moskompetence.

Sipas burimeve zyrtare, pas verifikimeve paraprake dhe analizës së provave të mbledhura në vendngjarje, Prokuroria e Tiranës ka arritur në përfundimin se ngjarja dyshohet të jetë kryer në kuadër të një grupi të strukturuar kriminal. Për këtë arsye, çështja i është referuar për kompetencë Strukturës së Posaçme kundër Korrupsionit dhe Krimit të Organizuar.

Atentati u regjistrua në rrethrrotullimin e Rinasit, një zonë me qarkullim të lartë, duke shkaktuar jo vetëm tronditje publike, por edhe shqetësim për nivelin e sigurisë në një nga hyrje-daljet kryesore të kryeqytetit. Nga të shtënat me armë zjarri humbën jetën Gilmando Dani dhe Muçi Shaljani, i njohur me nofkën “Sheqeri”.

Hetimet fillestare u përqendruan në identifikimin e autorëve, lëvizjet e tyre dhe motivet e mundshme të krimit. Burime pranë hetimit bëjnë me dije se indiciet e mbledhura deri më tani flasin për një organizim paraprak dhe përfshirje të më shumë se një personi, çka ka ngritur dyshime të forta për veprimtari të strukturuar kriminale.