Princesha e Norvegjisë qëndroi 4 ditë në shtëpinë e hamshorit dhe pedofilit Epstein, i biri arrestohet si përdhunues

Princesha e Kurorës së Norvegjisë, Mette-Marit, është përfshirë në një skandal të ri. Dokumentet e sapozbuluara të Jeffrey Epstein tregojnë se ajo ka pasur kontakt të shpeshtë me pedofilin e ndjerë, i dënuar për krime seksuale ndaj të miturve.

Në dosjen e publikuar nga Departamenti Amerikan i Drejtësisë, Princesha norvegjeze përmendet rreth 1 mijë herë dhe ka shkëmbyer dhjetëra email-e me Epstein, që sugjerojnë një komunikim të vazhdueshëm nga viti 2011 deri në 2014.

Sipas mediave norvegjeze, princesha madje ka qëndruar për katër ditë në rezidencën e Epstein në Florida në vitin 2013, kur ai nuk ndodhej aty.

Zbulimet vijnë në një moment të ndjeshëm për familjen mbretërore norvegjeze, pasi gjyqi i djalit të Mette-Marit, Marius Borg Hoiby, i akuzuar për përdhunim dhe vepra të tjera penale, pritet të nisë këtë javë në Oslo. Hoiby përballet me 38 akuza dhe rrezikon deri në 16 vjet burg, ndërsa ka mohuar akuzat më të rënda.

Në disa nga mesazhet, princesha i drejtohej Epstein-it me shprehje si “më gudulis mendjen”, “zemërbutë” dhe “një i dashur”, ndërsa në një email tjetër e falënderonte për lulet që i kishte dërguar, duke e mbyllur mesazhin me “Me dashuri”.

Në vitin 2012, ajo e përshkroi Epstein-in si “shumë simpatik” dhe bëri edhe një shaka provokuese, duke pyetur nëse ishte e papërshtatshme që një nënë të sugjeronte dy gra të zhveshura me dërrasë surfi për tapetin e dhomës së djalit të saj 15-vjeçar.

Dokumentet tregojnë se princesha qëndroi për katër ditë në rezidencën e Epstein në Palm Beach, Florida, në vitin 2013, në një kohë kur ai nuk ndodhej aty.

Në një deklaratë zyrtare, Mette-Marit pranoi se kishte treguar “gjykim të dobët” dhe shprehu pendesë të thellë për çdo kontakt me Epstein, duke e quajtur situatën “të turpshme”. Ajo theksoi gjithashtu solidaritetin e saj me viktimat e Epstein dhe tha se nuk kishte kuptuar në kohë natyrën e vërtetë të tij.

Pallati mbretëror njoftoi se princesha i kishte ndërprerë kontaktet me Epstein në vitin 2014, pasi dyshonte se ai po përpiqej ta përdorte lidhjen e tyre për ndikim. Ndërkohë, çifti mbretëror nuk pritet të marrë pjesë në gjyqin e Høiby-t, i cili nuk ka titull mbretëror dhe nuk është pjesë e vijës së trashëgimisë.

Djali i princeshës arrestohet për përdhunim

Djali i princeshës së kurorës së Norvegjisë, Marius Borg Høiby, është arrestuar me akuza të reja vetëm disa ditë para fillimit të gjyqit të tij për përdhunim, ndërsa nëna e tij vazhdon të përballet me pyetje në lidhje me marrëdhënien e saj me Jeffrey Epstein.

Distrikti i policisë së Oslos tha se Høiby ishte arrestuar të dielën në mbrëmje me dyshimin për sulm, kërcënime me thikë dhe shkelje të një urdhri kufizues. Arrestimi erdhi disa ditë përpara se Høiby, 29 vjeç, të dalë në gjyq me akuza për 38 vepra penale, përfshirë katër akuza për përdhunim, dhunë në familje ndaj një ish-partneres dhe filmim të paligjshëm të një numri grash pa dijeninë ose pëlqimin e tyre.

Gjyqi pritet të fillojë në Oslo të martën dhe të zhvillohet gjatë shtatë javëve. Høiby ka mohuar akuzat më të rënda, përfshirë ato të abuzimit seksual. Policia ka kërkuar katër javë burgim për Høiby-n me arsyetimin se do ta parandalonte atë nga përsëritja e veprës penale. Gjykata e rrethit të Oslos vendosi që ai mund të mbahet në paraburgim derisa të vendoset ndryshe nga autoriteti i prokurorisë ose gjykata deri më 2 mars.