Atentati në Lezhë, zbulohen emrat e personave të shpallur në kërkim, anëtarë të fisit Ndoka, shenjestër djali i Nikulajt

Policia e Lezhës ka shpallur në kërkim katër të rinj dhe ka ndaluar një efektiv policie, pas hetimeve për atentatin e ndodhur më 1 shkurt në fshatin Rrilë.

Në lidhje me ngjarjen, me urdhër të Prokurorisë është ndaluar efektivi i Policisë së Shtetit Besard Kovaçi, i cili ndodhej në të njëjtin ambient në momentin e sulmit. Ai akuzohet për veprën penale “Shpërdorim detyre”.

Sipas të dhënave zyrtare, efektivi ka qenë i pranishëm në berberhane dhe gjatë atentatit ka kundërpërgjigjur, duke qëlluar me armë zjarri në drejtim të autorëve të dyshuar.

Ndërkohë, Policia e Lezhës ka shpallur në kërkim shtetasit Geraldo Ndoka, Eliseo Ndoka dhe Kevin Ndoka, të dyshuar për veprat penale “Vrasje me dashje e mbetur në tentativë” dhe “Mbajtje pa leje e armëve të zjarrit dhe municionit”. Në kërkim është shpallur edhe 21-vjeçari Merando Nikulaj, i cili dyshohet se ishte objektivi i atentatit.

Kevin Ndoka nuk është emër i panjohur për policinë e Lezhës. Ai ishte shpallur në kërkim në vitin 2024 për një ngjarje të ndodhur në Rrilë, ku mbeti i plagosur Agron Puka, ndërsa vetëm pak javë më parë dyshohet se ka dhunuar dy persona në një lokal në qytetin e Lezhës.

Atentati ndodhi rreth orës 21:00, në një berberhane në fshatin Rrilë, Njësia Administrative Shënkoll. Si pasojë e të shtënave me armë zjarri, mbeti i plagosur berberi Sokol Daci, i cili u transportua menjëherë për ndihmë mjekësore dhe ndodhet jashtë rrezikut për jetën.

Hetimet vijojnë për zbardhjen e plotë të rrethanave dhe motiveve të atentatit ndaj Nikulajt, ndërsa policia po punon për kapjen e personave të shpallur në kërkim.

Njoftimi i policisë:

“Në lidhje me ngjarjen e ndodhur më datë 01.02.2026, rreth orës 21:00, në fshatin Rrilë, Njësia Administrative Shënkoll, bashkia Lezhë, ku mbeti i plagosur me armë zjarri një shtetas, Grupi i Posaçëm Hetimor i DVP Lezhë, nën drejtimin e Prokurorisë, ka vijuar intensivisht hetimet me qëllim zbardhjen e ngjarjes, dokumentimin ligjor, identifikimin dhe kapjen e autorëve.

Në vijim të veprimeve u ekzekutua urdhri i ndalimit, i lëshuar nga Prokurori, për shtetasin B. K., 24 vjeç, banues në fshatin Dragushë, Njësia Administrative Dajç, Bashkia Lezhë, i dyshuar për veprën penale “Shpërdorimi i detyrës”.

Nga tërësia e veprimeve hetimore e procedurale, ka rezultuar se si të dyshuar në këtë ngjarje janë përfshirë shtetasit G. N., E. N., K. N. dhe M. N., të cilët janë shpallur në kërkim.

Grupi i posaçëm hetimor, nën drejtimin e Prokurorisë Lezhë, vijon punën për dokumentimin e plotë ligjor të ngjarjes.Për shkak të hetimeve, nuk jepen të dhëna të tjera”.