Rusia hedh akuza ndaj Sekretarit të Përgjithshëm të OKB-së: Ka qasje selektive për vetëvendosjen e popujve

Rusia ka akuzuar Sekretarin e Përgjithshëm të OKB-së Antonio Guterres se po aplikon qasje selektive ndaj të drejtës së popujve për vetëvendosje.

Sipas zëdhënëses së Ministrisë së Jashtme ruse, Maria Zakharova, zyra e Guterresit ka thënë se e drejta e vetëvendosjes që vlen për Groenlandën nuk mund të aplikohet për Donbasin dhe Krimenë.

Zakharova e quajti këtë qëndrim hipokrizi dhe shtoi se Guterres po vendos vetë se cilët popuj kanë të drejta dhe cilët jo, duke braktisur parimet e Kartës së OKB-së dhe duke u bërë zëdhënës i propagandës perëndimore.

Gjithashtu ajo tha se ekspertët ligjorë të OKB-së kanë dalë jashtë kompetencave duke vlerësuar “kombësinë” e territoreve.

Në lidhje me presidentin ukrainas Volodymyr Zelensky, Zakharova e kritikoi ashpër fjalimin e tij në Davos, duke e quajtur retorikë agresive dhe duke hedhur poshtë interesin e pretenduar të Kievit për paqe.

Ajo përmendi se pas bisedave me Donald Trump, Zelensky ka kërkuar më shumë presion evropian ndaj Rusisë.

Për krizën energjetike në Ukrainë, ajo fajësoi udhëheqjen ukrainase dhe kritikoi idenë e BE-së për ndalim të gazit rus. Rusia – tha ajo – ka ridrejtuar eksportet drejt Azisë dhe do të mbrojë interesat e eksportuesve të saj nëse kontratat afatgjata nuk respektohen.