Arrestimi i Maduros, liderja e opozitës venezueliane: Hap i madh për njerëzimin

Liderja e opozitës venezueliane, María Corina Machado, thotë se arrestimi i Nicolás Maduro është “një hap i madh për njerëzimin , për lirinë dhe dinjitetin njerëzor”.

Maduro dhe gruaja e tij, Cilia Flores, u rrëmbyen nga kompleksi i tyre në Karakas të shtunën dhe u dërguan me aeroplan në SHBA si pjesë e një operacioni të forcave speciale.

Duke folur për Fox News, disa orë pasi Maduro u paraqit në një gjykatë në New York, Machado thotë se është “mirënjohëse” për veprimet e Presidentit të SHBA-së Donald Trump.

Machado u largua nga Venezuela muajin e kaluar për të pranuar Çmimin Nobel për Paqen për luftën e saj kundër asaj që Komiteti Norvegjez i Nobelit e quajti diktaturë. Ajo nuk është kthyer që atëherë në Venezuelë.

Duke u paraqitur në gjykatë së bashku me gruan e tij të hënën, Maduro i tha gjyqtarit “Unë jam ende president”, ndërsa u deklarua i pafajshëm për trafik droge dhe akuza të tjera.

María Corina Machado, 58 vjeçe, konsiderohet si një nga zërat më të respektuar në opozitën e Venezuelës dhe prej kohësh e ka denoncuar qeverinë e Nicolás Maduros si “kriminale”.

Ajo u ndalua të kandidonte në zgjedhjet e vitit 2024, por vazhdoi të bënte fushatë për kandidatin që e zëvendësoi në fletën e votimit, Edmundo González.

Maduro u shpall fitues, edhe pse numërimet e qendrave të votimit treguan se González kishte fituar me një diferencë të madhe.

Ajo është kërcënuar shumë herë me arrestim dhe për shkak të kësaj, nëna e tre fëmijëve e kaloi pjesën më të madhe të vitit të kaluar duke jetuar e fshehur. Ajo i kishte dërguar fëmijët e saj të rritur jashtë shtetit për sigurinë e tyre dhe nuk i pa ata për rreth dy vjet.

Machado u vlerësua me Çmimin Nobel për Paqen në vitin 2025 për “luftën e saj për të arritur një tranzicion të drejtë dhe paqësor nga diktatura në demokraci” në Venezuelë, dhe udhëtimi i saj për të marrë çmimin në Norvegji ishte mjaft i jashtëzakonshëm.

Udhëtimi i fshehtë, i cili ishte i rrezikshëm dhe i ndërlikuar, e pa Machadon të maskohej, të kalonte 10 pika kontrolli ushtarake pa u kapur dhe të largohej me një varkë druri nga një fshat bregdetar peshkimi.

Ajo është zotuar të kthehet në Venezuelë, pavarësisht se i njeh “saktësisht rreziqet” – megjithëse ky koment është bërë përpara se SHBA-të të kapnin Maduron.