Armëpushimi në Gaza/ Izraeli nis lirimin e 2 mijë të burgosurve palestinezë, Trump: Jemi të lodhur nga luftrat!

Dhjetëra mijëra palestinezë janë kthyer në Gazën veriore pas njoftimit të ushtrisë izraelite për një armëpushim, teksa ndërmjetësit shpresojnë se do t’i japë fund konfliktit dyvjeçar.

Izraeli ra dakord për marrëveshjen e armëpushimit me Hamasin mëngjesin e së premtes, të cilën ushtria konfirmoi se hyri në fuqi disa orë më vonë.

Agjencia e mbrojtjes civile e drejtuar nga Hamasi në Gaza tha se rreth 200,000 njerëz janë kthyer në Gazën veriore që nga shpallja e armëpushimit.

Si pjesë e marrëveshjes, trupat izraelite u tërhoqën në pozicionet e reja të dakordësuara të premten, ndërsa Hamasi pritet të lirojë 20 pengjet izraelite të mbijetuara dhe trupat e 28 pengjeve izraelite të hënën.

Pasi të lirohen të gjithë pengjet, Izraeli do të lirojë 250 të burgosur palestinezë që vuajnë dënime me burgim të përjetshëm dhe 1,700 banorë të Gazës të ndaluar pas sulmeve të 7 tetorit.

Presidenti i SHBA, Donald Trump ka deklaruar se është i bindur se marrëveshja e armëpushimit midis Izraelit dhe Hamasit do të “mbahet”.

“Të gjithë janë të lodhur nga luftimet, mund t’ju them se e pashë Izraelin duke kërcyer në rrugë”, tha presidenti amerikan.

Ai deklaroi gjithashtu se Hamasi aktualisht po mbledh pengjet, pasi janë në disa vende mjaft të vështira.

Trump shtoi se për pjesën më të madhe, ka konsensus se si do të funksionojnë fazat e ardhshme të planit të tij, por pranoi se disa detaje do të rishikohen. Pikat kryesore të ngërçit përfshijnë pasigurinë mbi çarmatimin e Hamasit dhe qeverisjen e ardhshme të Gazës.

Trump konfirmoi se do të takohet me shumë udhëheqës në Kajro të hënën për të diskutuar të ardhmen e Gazës, megjithëse lista e pjesëmarrësve nuk është ende e qartë.

Përpara kësaj, Trump pritet të udhëtojë në Izrael dhe të mbajë një fjalim para Parlamentit të vendit, Knessetit.

Ndërkohë, ushtria izraelite thotë se ka tërhequr pjesërisht trupat nga disa pjesë të Gazës, megjithëse gjysma e Rripit është ende nën pushtim.