Kulla e vrojtimit në Ksamil/ Tan Agolli i FSHZH-së i jep Xhavit Ismailit tenderin 5.5 mln euro

Kompania “Alba Konstruksion” sh.p.k. e Xhavit Ismailit, vëllai i ish-kryebashkiakut të Vorës, Fiqiri Ismaili, ka siguruar kontratën e radhës ” të majme” nga Fondi Shqiptar i Zhvillimit, institucion i drejtuar nga Dritan Agolli.

Bëhet fjalë për një tender të programit “Për Zhvillimin e Integruar Urban dhe Turizmin”, ku do të ndërtojë një Qendër Mirëseardhjeje për panaire dhe ekspozita si dhe një Kullë Vrojtimi në Ksamil.

“Alba Konstruksion” sh.p.k. është shpallur fituese e tenderit me vlerë 5 milion e 591 mijë euro, përfshirë dhe TVSH-në. Në tender ka marrë pjesë edhe “Fusha” sh.p.k., e cila kishte ofruar mbi 6 milionë euro dhe “Valona Konstruksion” shpk & “T.T.Sh.-Inshaat”, e cila nuk kishte dhënë asnjë ofertë. Si autoritet kontraktor, Fondi Shqiptar i Zhvillimit e ka shpallurt fituesin më 28 Maj.

E vendosur në qytetin bregdetar të Ksamilit, Qendra e Pritjes është projektuar për të shërbyer si një qendër e gjallë për aktivitete kulturore, sociale dhe rekreative. I përbërë nga dy struktura të dallueshme – Qendra e Pritjes dhe Kulla e Vëzhgimit – projekti integron në mënyrë të përsosur hapësirat publike me shkathtësi funksionale.

Qendra e Mirëseardhjes

Një strukturë dinamike dhe me shumë nivele, Qendra e Mirëseardhjes ofron hapësira të larmishme për angazhim publik:

• Kati Përdhes: Një treg i hapur me një planimetri fleksibël lejon shitësit vendas, panaire sezonale dhe tubime të komunitetit. Baret dhe zonat e ulëseve të integruara krijojnë një atmosferë të gjallë.
• Kati i Parë: Pret një Shkollë Verore Arti, duke ofruar punëtori krijuese, ekspozita dhe ngjarje kulturore.
  Kati i Dytë: I dedikuar sporteve dhe fitnesit, duke përfshirë zona stërvitjeje, dhoma zhveshjeje dhe të gjitha mjediset e nevojshme sportive.
• Tarraca në Çati: Një hapësirë e jashtme e gjithanshme, e adaptueshme si për aktivitete sportive ashtu edhe për ngjarje të komunitetit, duke maksimizuar mjedisin bregdetar piktoresk të Ksamilit.

Kulla e Vëzhgimit

Duke qëndruar si një pikë referimi vizuale dhe funksionale, Kulla e Vëzhgimit shërben për qëllime të shumëfishta:

• Qendra e Informacionit Turistik, duke ofruar udhëzime dhe burime për vizitorët.
• Platforma Panoramike e Shikimit, duke përfituar nga lartësia e kullës për pamje mahnitëse të bregdetit.
• Zona e Barit dhe Sallës së Rrugës, duke ofruar një ambient të relaksuar me pamje piktoreske.
• Zonat e Magazinimit dhe Shërbimit, duke mbështetur nevojat operative të qendrës.
• Qarkullimi Vertikal, duke siguruar akses të qetë në të gjitha nivelet. Së bashku, Qendra e Mirëseardhjes dhe Kulla e Vëzhgimit ripërcaktojnë hapësirën publike në Ksamil, duke nxitur angazhimin, kreativitetin dhe rekreacionin, ndërkohë që përqafojnë bukurinë natyrore të qytetit.” – thuhet në përshkrimin e tenderit.

Punimet parashikohet që të përfundojnë brenda qershorit të vitit të ardhshëm. Projekti për Zhvillimin e Integruar Urban dhe Turistik ka nisur prej disa vitesh dhe mbështetet nga Banka Botërore me një kredi 63.8 milionë euro dhe mbështet disa aktivitete në qytete si Berati, Gjirokastra, Përmeti dhe Saranda.

Kompania “Alba Konstruksion” sh.p.k. e Xhavit Ismailit njihet si një nga fituesit më të shpeshtë të tenderave të FSHZH-së, por edhe tendera nga institucione të tjera publike, sidomos nga Bashkia e Tiranës.