Radiografia e disfatës / PD-PL 250 mijë vota më pak se në 2021, rënia sipas qarqeve, humbësit më të mëdhenj Gaz Bardhi, Xhelal Mziu dhe Tritan Shehu

Nga Adriatik Doçi

Teksa po numërohet votat në kutitë e fundit, humbja përtej pritshmërive e Partisë Demokratike në zgjedhjet e 11 majit, po merr formë përfundimtare. PD, nën drejtimin e Sali Berishës, rezulton me një rënie prej 12.5 % të votave krahasuar me rezulatatin në zgjedhjet e 2021. Në zgjedhjet e 11 majit, PD, bashkë me aleatët, ka marrë rreth 170 mijë vota më pak se sa (PD pa LSI) në zgjedhjet e 25 prillit 2021.

Disfata e PD-së merr një tjetër përmasë nëse konsiderojmë një tjetër tregues elektoral. Në këto zgjedhje, PD-ja garonte e shkrirë me Partinë e Lirisë, ish LSI-ja. Në vitin 2021, LSI-ja ka marrë 107 mijë vota. PD dhe ish LSI kanë marrë rreth 730 mijë vota në 2021. Në këto zgjedhje, Partia e Lirisë ishte e përçarë dhe me kryetarin në burg. Ndoshta votat e PL-së janë pakësuar deri në përgjysmim në këto zgjedhje.

Gjithsesi, PD dhe PL, në zgjedhjet e 11 majit nuk arrijnë dot të marrin 500 mijë vota. Koalicioni i opozitar ka humbur të paktën 250 mijë vota në raport me rezultatin në 2021. Në të 12 qarqet, PD-ja, e shkrirë me PL-në, ka rënë nga 9 deri në 20 % në raport me zgjedhjet e 2021, kur garonte pa LSI-në.

Rrudhjen më të madhe PD-ja e ka pësuar në qarqet e Fierit, Dibrës dhe Gjirokastrës, ku fushata është drejtuar nga Gazment Bardhi, Tritan Shehu dhe Xhelal Mziu. Barra e humbjes në rang kombëtar rëndon mbi Sali Berishën, por edhe mbi Sekretarin e Përgjithshëm të PD-së, Flamur Noka, i cili shan dhe kërcënon çdo qytetar që nuk mendon si ai.

Opozita pretendon se ‘narkoregjimi’ i ka vjedhur zgjedhjet. Është një alibi që përsëritet që nga viti 2015. Por, ka një fakt që e rrëzon këtë pretendim; Opozita ka fituar në Lazarat, Kavajë, Mirditë, Kukës, Shkodër, në Krujë, në Pukë, në Has, në Kamëz etj. Së dyti, nëse bashkojmë votat e PD-së me tre derivatet e saj, digerenca me PS është e ngushtë.

Rënia e PD-së sipas qarqeve

Fier 20.2 %, drejtues fushate Gazment Bardhi
Dibër 14.4 %, drejtues fushate Xhelal Mziu
Gjirokastër, 14.2 %, drejtues fushate Tritan Shehu
Korçë, 13.9 %, drejtues fushate Ivi Kaso
Lezhë, 13.6 %, drejtues fushate Agron Gjekmarkaj
Shkodër, 13.4 %, drejtues fushate Luçiano Boçi
Elbasan, 12.5 %, drejtues fushate Tomor Alizoti
Berat, 12.5 %, drejtues fushate Enno Bozdo
Vlorë, 11.6 %, drejtues fushate Bujar Leskaj
Tirana, 10.4 %, drejtues fushate Belind Këlliçi
Kukës, 12.5 %, drejtues fushate Flamur Hoxha
Durrës, 9 %, drejtues fushate Oerd Bylykbashi