Fëmijët vranë dhe groposën babanë në Durrës – Pokuroria rëndon akuzën për Hygerta Metën

Prokuroria e Durrësit ka ndryshuar akuzën për Hygerta Metën, e cila akuzohet se bashkë me vëllain e saj ka vrarë dhe asgjesuar kufomën e babait të saj, Pëllumb Metë afro një vit më parë në Shënvlash.

Teksa sot (14.01.2025) do të nisë procesi gjyqësor në ngarkim të tre fëmijëve: Hygerta Meta, Hysen dhe Amarildo Meta, organi i akuzës bënë të ditur se për 19 vjeçaren ka ndryshuar akuza: ‘fshehja dhe asgjesimi i kufomës’ në ‘vrasje për shkak të marrëdhënieve familjare’ duke rënduar kështu pozitën proceduriale dhe duke e dërguar në gjykim me një akuzë të re për vrasje në bashkëpunim me vëllain Hysen Meta.

Kujtojmë që Hygerta Meta ka ndryshuar disa herë version, ku disa herë ka marrë përsipër vrasjen dhe disa herë e ka përjashtuar veten nga përfshirja në ekzekutimin e babait të saj. 

Ngjarja e rëndë, arsyet e së cilës mbeten ende mister, ndodhi më 10 shkurt, por u zbulua nga policia vetëm më 24 shkurt, disa ditë pasi djali i madh i viktimës, Hyseni, denoncoi zhdukjen e të atit.

Hygerta dhe Hysen Meta akuzohen se kanë vrarë të atin, ndërsa dyshohet se në bashkëpunim me vëllain e tyre Amarildon, më pas e groposën në sallën e bagëtive, ku edhe u gjet trupi i pajetë i viktimës.

25-vjeçari Hysen Meta akuzoi të motrën, Hygertën, si autore të krimit duke u shprehur se ishte ajo që e qëlloi për vdekje të atin.