Trump emëron ambasadorin në Panama, mes replikave për kontrollin e kanalit

Presidenti i zgjedhur amerikan, Donald Trump, emëroi komisionerin e qarkut Miami-Dade, Kevin Marino Cabrera, për të shërbyer si ambasador në Panama.

Trump e përshkroi Cabrerën si “një luftëtar të ashpër për parimet America First”, për të cilin ai tha se ka qenë instrumental në nxitjen e rritjes ekonomike dhe nxitjen e partneriteteve ndërkombëtare.

“Pak e kuptojnë politikën e Amerikës Latine si Kevin – Ai do të bëjë një punë fantastike duke përfaqësuar interesat e kombit tonë në Panama!”, tha Trump në një postim në Truth Social, platformën e tij të komunikimit.

Njoftimi i zgjedhjes së Cabrera për ambasador vjen pasi Trump kërcënoi se do të rivendoste kontrollin e SHBA-ve mbi Kanalin e Panamasë, të cilin ajo e administroi për dekada përpara se t’ia dorëzonte Panamasë në vitin 1999.

Trump tha se vendi i Amerikës Qendrore, me të cilin SHBA-të kanë marrëdhënie diplomatike që nga viti 1903, “po na shqyen në Kanalin e Panamasë, shumë përtej ëndrrave të tyre më të çmendura”.

Në një postim në Truth Social të mërkurën, Trump akuzoi ushtarët kinezë se operojnë në mënyrë të paligjshme kanalin dhe “gjithmonë sigurohen se Shtetet e Bashkuara vendosin miliarda dollarë para ‘riparimi’, por nuk do të kenë absolutisht asgjë për të thënë për ‘asgjë’.

Presidenti i Panamasë, José Raul Mulino, ka thënë se Kina nuk kishte asnjë ndikim në administrimin e kanalit.

Kina nuk e kontrollon apo administron kanalin, por një degë e CK Hutchison Holdings me bazë në Hong Kong ka menaxhuar prej kohësh dy porte të vendosura në hyrjet e kanalit në Karaibe dhe në Paqësor.