Koreja e Veriut ka reaguar për herë të parë ndaj krizës politike në Korenë e Jugut, duke kritikuar presidentin Yoon Suk Yeol për vendosjen e një “diktature ndaj popullit”.

Në një koment të publikuar nga agjencia shtetërore KCNA, regjimi i Phenianit e quajti veprimin e presidentit “të çmendur” dhe e përshkroi Korenë e Jugut si një “shtet gangster”.

Kjo deklaratë erdhi pas përpjekjes së dështuar të Yoon për të shpallur ligjin ushtarak me qëllim shtypjen e atyre që ai i quajti “forca pro-veriore dhe anti-shtetërore”. Ligji ushtarak, i cili zgjati vetëm gjashtë orë para se të rrëzohej nga Parlamenti, çoi në krizën më të rëndë politike në Korenë e Jugut për dekada.

KCNA raportoi se gjatë përpjekjes për zbatimin e ligjit ushtarak, ushtarë dhe helikopterë u vendosën për të penguar hyrjen e deputetëve në ndërtesën e asamblesë kombëtare. 

Ndërkohë, protesta masive shpërthyen kundër veprimeve të presidentit, duke përfshirë pankarta dhe shkopinj me drita, ndërsa kërkohej shkarkimi i tij.

Ekspertët sugjerojnë se Koreja e Veriut dhe vendet autoritare si Kina dhe Rusia mund të përfitojnë nga kriza në Korenë e Jugut për avantazhe gjeopolitike. Leif-Eric Easley, profesor në Universitetin Ewha, tha për “The Guardian” se regjimet autoritare shpesh shpresojnë se krizat në vendet demokratike do të dobësojnë aleancat dhe rivalët e tyre.

Ndërsa në Korenë e Veriut popullsia përballet me varfëri dhe urie, Kim Jong-un vazhdon të investojë në armë bërthamore dhe raketa balistike.