Ahmetaj në kërkim ndërkombëtar, SPAK kërkon ndihmën e Zuckerberg

Prej pothuajse tre muajsh Arben Ahmetaj është shpallur në kërkim ndërkombëtar.

Por edhe pse në arrati ai ka reaguar disa herë përmes rrjetit social Facebook.

Lëvizja e fundit e SPAK, ka të bëjë pikërisht me këtë.

Mësohet se Prokuroria e Posaçme i ka dërguar të dhënat e Ahmeajt kompanisë “Meta” të Mark Zuckerberg.

Kështu, SPAK pretendon se do të gjurmojë vendndodhjen e ish -numrit dy të qeverisë, përmes mekanzimit “Transparency Center” të kompanisë, duke zbuluar se nga cili vend bëhen log-imet dhe publikimet e tij në Facebook.

Gjykata e Posaçme firmosi disa muaj më parë urdhër-arrestin për ish zv -Kryeministrin.

Ish-numri dy i qeverisë Rama, akuzohet për refuzim për deklarim, fshehje ose deklarim i rremë i pasurive, korrupsionit pasiv dhe aktiv i funksionarëve të lartë shtetërorë dhe pastrim të produkteve të veprës penale, vepra penale nga të cilat mund të dënohet deri në 15 vite burg.

Avokati i Arben Ahmetajt, Henrik Ligori ka zbuluar më parë se klienti i tij ndodhet në Angli, ku po qëndron pranë familjes së tij.