Hetimi top sekret: “Operacionalja” me një linjë të paautorizuar interneti, AMP bën kallëzim penal

Agjencia e Mbrojtjes Policore ka kallëzuar në prokurorinë e Tiranës Forcën e Posaçme Operacionale, pasi është zbuluar se në këtë strukturë është përdorur një linje e paautorizuar interneti.

Kallëzimi është bërë në korrik dhe hetimet po drejtohen nga prokurori Dritan Nushi.

Përdorimi i një linje të paautorizuar interneti ngre dyshime të forta se mund të jetë përdorur për transferim të dhënash. Ky dyshim ka ardhur dhe pas konsultimeve me njohës të mirë të specialistëve të IT-së. Po ashtu ka dyshime se kjo linjë mund të jetë përdorur dhe për hakerim.

Kallëzimi i AMP është bërë përpara se ish-shefi i Operacionales, Oltion Bistri të arrestohej. Hetimi është mbajtur top sekret dhe prokuroria nuk ka bërë komente në lidhje me rastin, ndërsa nuk dihen ende se cilët janë zyrtarët e kallëzuar.

Nuk dihet nëse ky kallëzim do të rëndojë apo jo akuzën për Bistrin, i cili në dosjen “Metamorfoza” të SPAK shfaqet duke bashkëpunuar me personazhe të botës së krimit dhe biznesmenin Pëllumb Gjoka, ky i fundit i arrestuar si porositës i disa vrasjeve.