Melania Trump, Giorgia Meloni dhe Ursula von der Leyen në video dhe imazhe nudo, alarm në Itali nga Inteligjenca Artificiale

Autoritetet italiane kanë bllokuar faqen Cfake.com, e cila publikonte qindra imazhe të krijuara me inteligjencë artificiale që paraqisnin politikane, aktore dhe figura të tjera publike në situata intime pa pëlqimin e tyre.

Mes personave të shfaqur në këto imazhe ishin edhe bashkëshortja e presidentit amerikan Donald Trump, Melania Trump, presidentja e Komisionit Evropian Ursula von der Leyen dhe kryeministrja italiane Giorgia Meloni, e cila së fundmi kishte denoncuar publikisht një rast të ngjashëm të manipulimit të imazhit të saj.

Prokuroria italiane siguroi miratimin e gjyqtares Angela Gerardi për bllokimin e faqes. Për shkak se serverët e saj ndodheshin në Shtetet e Bashkuara, autoritetet nuk mundën të sekuestronin platformën, por urdhëruan bllokimin e aksesit ndaj saj.

Në faqe ekzistonte një seksion i quajtur “Images Jobs Politician”, ku publikoheshin imazhe të grave të njohura nga politika kombëtare dhe ndërkombëtare, të krijuara pa autorizimin e tyre. Platforma përmbante gjithashtu materiale që paraqisnin aktore në skena me përmbajtje seksuale ose nudo të plota.

Hetimi nisi në tetor 2025 pas sinjalizimeve të marra nga Policia Postare italiane për publikimin e materialeve audiovizive që përfshinin gra nga politika, arti, sporti dhe kultura.

Në maj, Giorgia Meloni publikoi në Facebook një fotografi të rreme të krijuar me inteligjencë artificiale, ku fytyra e saj ishte vendosur mbi trupin e një gruaje me të brendshme. Ajo paralajmëroi se teknologjitë e “deepfake” mund të përdoren për të mashtruar, manipuluar dhe dëmtuar këdo.

“Deepfake-et janë një mjet i rrezikshëm, sepse mund të mashtrojnë, manipulojnë dhe godasin këdo. Unë mund të mbrohem. Shumë të tjerë jo. Prandaj duhet gjithmonë të verifikojmë përpara se të besojmë”, deklaroi Meloni.

Faqja kishte pamjen tipike të platformave për të rritur, ishte në gjuhën angleze dhe kërkonte vetëm një vetëdeklarim të moshës madhore për të hyrë në përmbajtje.

Në kuadër të bashkëpunimit ndërkombëtar, njësia Homeland Security Investigations (HSI) e Departamentit Amerikan të Sigurisë Kombëtare njoftoi se i kishte kërkuar Departamentit të Drejtësisë të ndërmarrë veprime kundër domenit Cfake.com, duke u bazuar në ligjin federal “Take It Down Act”.

Autoritetet e konsiderojnë operacionin një rezultat të rëndësishëm të bashkëpunimit ndërkombëtar në luftën kundër abuzimit me teknologjitë e inteligjencës artificiale dhe shpërndarjes pa pëlqim të materialeve seksuale të gjeneruara artificialisht, me synimin për të mbrojtur dinjitetin, imazhin dhe të drejtat e viktimave.