Konflikti për një kanal vaditës, kush është 32-vjeçari që u godit për vdekje në Divjakë

Publikohet fotoja e 32-vjeçarit Besmir Kumria i cili u godit për vdekje me thikë në një lokal në Divjakë.

Ngjaja e rëndë ndodhi në orët e vona të natës së djeshme në fshatin Kryekuq të Divjakës. 32-vjeçari u godit disa herë me thikë nga i riu Xhesion Toromani. 

Sipas informacioneve jo zyrtare, pasi ka parkuar makinën në rrugë, autori Xhesion Toromani, 25 vjeç, ka hyrë me thikë në dorë në drejtimin e tavolinës ku ishte viktima së bashku me persona të tjerë.

I pamaskuar, e goditi disa herë me thikë dhe u arratis menjëherë nga vendngjarja. Pas disa orësh, policia arrestoi autorin e ngjarjes.

Nga hetimet paraprake dyshohet se shtetasi 25 vjeçari vrau shtetasin Besmir Kumria, pasi familjet e tyre kanë pasur konflikte të vazhdueshme për një kanal vaditës në fshat.

“Goditi me thikë një shtetas, i cili për pasojë humbi jetën; pas veprimeve të shpejta dhe profesionale të Policisë u identifikua dhe u vu në pranga autori i dyshuar.

Pas vrasjes, autori u largua, por u kap pas disa orësh ndjekjeje nga shërbimet operacionale të DVP Fier.

Gjatë mesnatës, shërbimet e Komisariatit të Policisë Divjakë, pas marrjes së njoftimit se në fshatin Kryekuq një shtetas i paidentifikuar kishte hyrë në një lokal dhe kishte goditur me mjet prerës shtetasin B. K., 32 vjeç (i cili ishte në shoqërinë e miqve të tij), shkuan menjëherë në adresën e dhënë.

U ngrit grup i posaçëm hetimor, në drejtimin e Prokurorisë, me qëllim zbardhjen e plotë të ngjarjes, identifikimin dhe kapjen e autorit.

Si rezultat i ndjekjes së pandërprerë nga forcat operacionale të DVP Fier, u bë e mundur kapja dhe shoqërimi në Polici i autorit të dyshuar, shtetasit Xh. T., 25 vjeç, banues në Kryekuq, i cili do të arrestohet për veprat penale “Vrasja me paramendim” dhe “Prodhimi dhe mbajtja pa leje e armëve të ftohta”.

Nga hetimet paraprake dyshohet se shtetasi Xh. T. e ka vrarë shtetasin B. K., pasi familjet e tyre kanë pasur konflikte të vazhdueshme për një kanal vaditës në fshat.

Vijon puna për dokumentimin e plotë ligjor të ngjarjes”, njoftoi policia.