Nga Ekuadori në Pire, ja si trafikantët shqiptarë merrnin kokainën; zbardhet skema, 200 mijë euro për çdo ngarkesë

Në port ata quheshin “komandantë”. Ata mund të hipnin në anije në çdo kohë, pa i kontrolluar askush dhe kishin një kartë hyrjeje falas në port pa kufizime, ndryshe nga pjesa tjetër e punonjësve të Cosco-s.

“Komandanti” dhe 3 kontraktorët ndihmës, pjesë e grupit Mani, siç ishin “pagëzuar”, siguroheshin që të kishin të njëjtin turn.

Grupi që siguronte daljen e kokainës nga porti u arrestua në një operacion të Policisë greke në portin e Pireut. Ky rrjet dyshohet se ka vepruar në muajt e fundit dhe është hetuar nga agjentët e anti-drogës.

Sipas informacioneve, udhëheqësi është një 35-vjeçar i arrestuar në të kaluarën për trafik droge dhe dyshohet se ka qenë personi që mbante kontakte me trafikantët. Të tjerët kishin role të dallueshme dhe specifike. 

Njëri nga të akuzuarit thuhet se mori rolin e menaxherit të turnit, duke u siguruar që të gjithë anëtarët e rrjetit të punonin në të njëjtat orare kur kishte informacion se një kontejner me drogë do të mbërrinte së shpejti. Një tjetër dyshohet se ishte përgjegjës për funksionimin e kamerave (për të fshehur gjurmët e tyre). 

Informacioni rreth veprimeve të tyre kishte arritur te anti-droga, e cila i kishte vënë ata nën mbikëqyrje diskrete. 

Të arrestuarit ishin veçanërisht të kujdesshëm në bisedat me njëri-tjetrin, duke u përpjekur të shmangnin çdo provë inkriminuese që do të tradhtonte veprimet e tyre.

Kontejner nga Ekuadori

Metoda e tyre e veprimit ishte specifike, raportojnë mediat greke, referuar burimeve nga grupet e hetimit që trajtuan çështjen. 

Një organizatë kriminale e ngjashme me 7 të akuzuarit duket se e ka “ngarkuar” kokainën në një kontejner në Ekuador dhe personat e arrestuar më vonë e kanë marrë atë në portin e Pireut, ku përfituesit e fundit janë trafikantët shqiptarë të drogës.

Anija u ankorua në port në agim, ku filluan të shkarkoheshin kontejnerët me banane. Prej andej, dy punonjësit që kishin akses në port morën 34 kilogramë kokainë në qese dhe i transportuan me motoçikleta në një Porsche Cayenne, ku i priste një bashkëpunëtor i tretë, me qëllim transportimin e tyre te trafikantët shqiptarë të drogës. 

Policia nisi operacionin duke ndjekur makinën, ndërsa drejtuesi i mjetit tentoi të përplaste një nga automjetet e forcave të rendit, për t’iu shmangur ndjekjes.

Oficerët u detyruan të qëllonin mbi automjet, duke shënjestruar gomat, një mënyrë kjo për të ndalur automjetin.

Automjeti luksoz, sipas informacioneve, i përket njërit prej shtatë të arrestuarve.

Tarifa “e artë” 

“Tarifa” për çdo kontejner, sipas informacioneve, thuhet se arriti në 200,000 euro, një shumë që ndahej midis anëtarëve të rrjetit pas çdo fature. 

Kokaina ishte fshehur në frigoriferë brenda kontejnerëve. Një kaçavidë e thjeshtë mjaftonte për të hapur vendet e fshehta dhe për të marrë drogën që kishte mbërritur nga Ekuadori. Një nga të pandehurit hipi në anije, nxori kokainën, e fshehu në qese dhe ia dorëzoi një anëtari të dytë. Ky anëtar nga ana tjetër u largua nga porti dhe ia dorëzoi drogën një anëtari të tretë që po priste në verandë. /Pamfleti