Atentati ndaj 30-vjeçarit, shënjestra është kushëriri i të “fortit” të Vlorës. Autorët djegin makinën në autostradë

Persona ende të paidentifikuar kanë qëlluar me kallashnikov në drejtim të makinës në të cilën po udhëtonte Kevin Hajrulla rreth orës 21:30  (18 dhjetor 2024) në lagjen 24 maj’ të qytetit të Vlorës.

30-vjeçari i plagosur është dhe djali i xhaxhait të Inez Hajrullës, i cili njihet si i “forti” i Vlorës. Duket se atentati është nesazh për Inez Hajrullai, i cili u ka shpëtuar disa atentateve.

 Nga të shtënat ka mbetur i plagosur dhe Armand Spahiu 35 vjeç, i cili ishte kalimtar i rastit, dhe rezulton të punojë si tregtar shumice.

Dyshohet se  ky i fundit ndodhej rastësisht në atë moment kur ndodhi atentati. Pas krimit autorët kanë djegur makinën në autostradën Vlorë-Fier. Policia ka mbërritur në vendin e ngjarjes dhe po mbledh provat materiale.

Nuk dihen ende detaje në lidhje me atentatin por në vendngjarje janë gjetur një sërë gëzhojash. Ndërkohë që dhe një makinë ka gjurmë plumbash.

Agjentët e Operacionales kanë ngritur pika kontrolli. Ende nuk dihet e kaluara e Kevin Hajrullës.

Njoftimi i policisë

Mbrëmjen e sotme, rreth orës 21:30, në lagjen “24 Maji”, Vlorë, në rrethana ende të paqarta, është plagosur me armë zjarri shtetasi K. H., rreth 30 vjeç,  i cili udhëtonte me një automjet tip “Benz”. Si pasojë e të shtënave, është plagosur me armë zjarri edhe shtetasi A. S., 35 vjeç, i cili ndodhej në afërsi në momentin e ngjarjes.

Të dy personat janë transportuar menjëherë në Spitalin Rajonal Vlorë dhe ndodhen nën kujdesin e mjekëve.

Gjatë krehjes së zonës në afërsi të fshatit Panaja, është bërë i mundur lokalizimi i automjetit të dyshuar të përdorur nga autorët, i cili është përfshirë nga flakët. Po punohet për shuarjen e zjarrit.

Shërbimet e Policisë kanë mbërritur menjëherë në vendngjarje dhe po punojnë intensivisht për identifikimin dhe kapjen e autorit/autorëve të dyshuar.

Grupi hetimor po vijon punën për zbardhjen e rrethanave të plota të ngjarjes.