E rëndë në Sarandë, oficeri i policisë bie në gropën e ashensorit; niset me urgjencë drejt Traumës

Një ngjarje e rëndë ka ndodhur mëngjesin e sotëm në Sarandë.

Oficeri i policisë së Komisariatit të Sarandës, 63-vjeçari Klement Bello është aksidentuar rëndë pasi ka rënë në gropën e ashensorit të pallatit ku banonte.

Dyshohet se ka qenë një defekt në ashensor, që ka hapur derën por pa qenë ashensori në vend.

Pa e pasur mendjen, sapo është hapur porta, 63-vjeçari ka tentuar të futet brenda dhe për rrjedhojë ka rënë në gropë në një lartësi rreth 6 metra.

Ai është transportuar me urgjencë në spitalin e Sarandës ku ka marrë ndihmën e parë.

Sipas bluzave të bardha për shkak të frakturës në kokë dhe dëmtimit në mushkri ai është nisur me helikopter drejt spitalit të Traumës në Tiranë.