Përfundon zyrtarisht censi për popullsinë dhe banesat, vazhdon përpunimi i të dhënave

Instituti i Statistikave (INSTAT) njoftoi se procesi i Censit të Popullsisë dhe Banesave 2023 ka përfunduar. INSTAT gjithashtu njoftoi se po vazhdon puna për verifikimin në terren të statusit të banesave dhe refuzimeve, deri në datë 24 Nëntor. Nga data 20 Nëntor deri në 20 Dhjetor do të bëhet përpunimi i të dhënave dhe organizohet Anketa Pas Cens.

Njoftimi i INSTAT:

INSTAT njofton median dhe opinionin publik se procesi i Censit të Popullsisë dhe Banesave 2023 ka përfunduar. Falenderojmë të gjithë qytetarët për përgjegjshmërinë e lartë për t’u bërë pjesë e këtij procesi të rëndësishëm.

Ju bëjmë me dije se stafi INSTAT po vazhdon punën për verifikimin në terren të statusit të banesave dhe refuzimeve, deri në datë 24 Nëntor.

Për vlerësimin e cilësisë së procesit dhe mbulimin, prej datës 20 Nëntor-20 Dhjetor 2023, INSTAT do të organizojë Anketën Pas Cens sipas rekomandimeve të Kombeve të Bashkuara dhe BE, në 100 zona numërimi, të shpërndara në të gjithë territorin e vendit. Ky proces do të angazhojë 100 anketues dhe 25 kontrollorë të cilët do të trokasin përsëri në dyert e qytetarëve, në zonat e përzgjedhura.

Ju bëjmë thirrje qytetarëve të lehtësojnë punën e stafit të INSTAT!

Të dhënat e mbledhura do të jenë konfidenciale dhe do t’u shërbejnë qytetarëve për shërbime dhe punë publike më të mira në të ardhmen!