Një tjetër kryebashkiak socialist nën hetim nga SPAK, ja për se dyshohet
Aktualitet
Publikuar: 24/10/2023
Një tjetër kryebashkiak socialist është nën hetim nga SPAK për krime zgjedhore. Bëhet fjalë për kryetarin e Bashkisë së Këlcyrës, Klement Ndoni.
Ai akuzohet nga disa banorë të Këlcyrës se u ka ofruar favore në këmbim të votës për të në zgjedhjet vendore të 14 majit.
Më konkretisht, bëhet fjalë për një 75-vjeçar i cili ka deklaruar se punonjësit e bashkisë i kanë ofruar atij ndihmë sociale dhe punësimin e djalit të papunë, në këmbim të votave familjare për Ndonin.
Sipas dëshmisë së Agim Bakushllarit episodi kishte ndodhur në zyrat e Bashkisë vetëm dy ditë para zgjedhjeve lokale.
Klement Ndoni mori më 14 maj 2023 mandatin e katërt në krye të Bashkisë Këlcyrë. Ai rezulton i kallëzuar edhe më parë në prokurori me akuzat për shpërdorim detyre, në disa projekte në qytet apo emërime në sektorin publik.
