Rishi Sunak shpallet kryeministri i ri i Britanisë së Madhe, Penny Mourdant tërhiqet nga gara

Rishi Sunak do të bëhet kryeministri i parë britanik me origjinë aziatike i Mbretërisë së Bashkuar, pas dorëheqjes së kandidates së vetme, Penny Mordaunt.

Kryetari i Komitetit,  Graham Brady konfirmoi se udhëheqësi i ri i konservatorëve Rishi Sunak do t’u drejtohet deputetëve në orën 14:30, me një fjalim.

Sonte në mbrëmje Mbreti Charles do të kthehet në Londër, në Pallatin Buckingham, ku do të pranojë dorëheqjen e Liz Truss dhe pritet të emërojë Rishi Sunak si kryeministër.

Nuk është thënë ende afati kohor për dorëzimin e pushtetit, por Lord O’Donnell, ish-sekretari i kabinetit, tha se nuk priste që Sunak të bëhej kryeministër deri nesër.

Sunak, 42 ​​vjeç, lindi në Southampton, Anglinë jugore, nga prindër me origjinë indiane që kishin emigruar në Britani nga Afrika Lindore. Familja e tij emigroi në Britani në vitet 1960, një kohë kur shumë njerëz nga ish-kolonitë e Britanisë mbërritën për të ndihmuar në rindërtimin e vendit pas Luftës së Dytë Botërore.

Pas diplomimit në Universitetin e Oksfordit, ai më vonë studioi në Universitetin e Stanfordit ku takoi gruan e tij Aksatha Murthy, babai i së cilës është miliarderi indian Narayana Murthy, themelues i gjigantit Infosys Ltd.

Sunak në moshën 39-vjeçare,  u bë Kancelar i Thesarit nën udhëheqjen e Johnson. Kritikët e tij thonë se ai tradhtoi Johnson, të cilin e kishte promovuar kur dha dorëheqjen si ministër i financave në fillim të korrikut.

Kjo çoi në shpërbërjen e kabinetit dhe rënien e mëvonshme të Johnson.