Dosja/ Agim Kajmaku përdorte biznesin e luleve për trafik droge; si ra në prangat e policisë bashkë me nipin e tij

Zbardhen detajet për arrestimin e ish-kryebashkiakut të Vorës, Agim kajmaku në Itali. Ky i fundit është vënë në pranga para disa ditësh, pasi është përfshirë në trafik kokaine. Ai u kap me rreth 20 kilogram kokainë.

Lënda narkotike ishte fshehur në disa vazo me lule dhe bashkë me të u arrestua dhe nipi i tij. Agim Kajmaku zyrtarisht, prej vitit 2004 merret me biznesin e fidanëve, farërave dhe plehrave.

Shitësi i luleve në zonën e Vorës e më gjerë, “Kajmaku shpk” e shtoi aktivitetin duke u marrë me “prodhim, shitje, tregim shumë e pakicë farash, fidanëve, pemëve frutore e dekorative, etj., punim i sipërfaqeve të gjelbërta, parqe, dekore urbane…”. Kjo deri në mesin e korrikut, kur Agim Kajmaku, fitues pa garë në votimet e 30 qershorit, u zgjodh kryetar i bashkisë së Vorës. Ai më pas ja shiti aksionet bashkëshortes.

Kajmaku ishte klient i vjetër i një fidanishteje në Itali, në zonën e Grottamare. Ai bashkë me nipin kishin blerë disa fidanë lulesh të vegjël, por bënë ndryshimin e vazove. Edhe pse ishin lule të vogla, ata i vendosën në vazo shumë më të mëdha. Kjo ngjalli dyshime te pronari italian i fidanishtes, që vuri në dijeni policinë. Brenda vazove ndodhej lënda narkotike.

Sipas informacioneve, grupi ku bënte pjesë Kajmaku ishte zbuluar nga Guardia Di Finaza para 8 muajsh dhe deri më tani ai ishte në monitorim total. Ndërkohë 2 muaj më parë, anëtarët e grupit monitoroheshin 24 orë, pasi ishin instaluar kamera dhe përgjues në zonat që ata frekuentonin. Sipas të dhënave, Kajmaku ishte anëtar i ri i grupit. Kur është ndaluar nga policia ai është prezantuar i Agim Kajmaku, i datëlinjdes 6 korrik 1971.

Nga autoritetet shqiptare nuk ka asnjë të dhënë deri më tani mbi operacionin e kryer, ndërkoha që prite të ketë dhe reagime.

Agim Kajmaku u zgjodh kryetar i bashkisë Vorë në zgjedhjet e 30 qershor 2019 por pas denoncimit nga PD se kishte shkelur ligjin e dekriminalizimit nisën edhe hetimet nga prokuroria, e cila i dha të drejtë opozitës. Kajmaku kishte fshehur një dënim në Greqi ku figuronte me emër tjetër. Më 1 nëntor, Komisioni Qendror i Zgjedhjeve vendosi ta shkarkojë nga detyra Kajmakun, në mënyrë unanime me 5 vota pro.

Kryebashkiaku Kajmaku u akuzua nga Partia Demokratike se ishte arrestuar në Greqi, nën emrin Jorgo Toto, për veprën penale të falsifikimit të parave, por që nuk e kishte paraqitur në formularin e Dekriminalizimit.

Akuzat e PD u konfirmuan edhe nga Prokuroria e Përgjithshme, e cila pasi bëri verifikimin e shenjave të gishtërinjve të Kajmakut dhe shenjat e gishtërinjve të shtetasit Jorgo Toto, të arrestuar në Greqi, rezultoi se ishte i njëjti person.

Ai u proceduar për falsifikim formulari dhe arriti të arratisej për disa muaj, derisa u prangos në një spital privat. Por duket se Kajmaku nuk ka qëndruar shumë në qeli.