Nuk është proces aq ‘i pafajshëm’ / Kujdes me aksesin e plotë të fotove në aplikacione!

Ekspertë të privatësisë dhe sigurisë kibernetike kanë ngritur shqetësime lidhur me lejimin e aksesit të plotë të aplikacioneve në galerinë e fotove të telefonit, një funksion i përdorur gjerësisht në platforma si Instagram.

Sipas tyre, dhënia e aksesit të pakufizuar në albumin e fotove mund të rrisë rrezikun e ngarkimit aksidental të imazheve që përdoruesi nuk ka ndërmend t’i publikojë, si dhe të ekspozimit të materialeve personale që mund të përmbajnë të dhëna të ndjeshme.

Eksperti i sigurisë dhe privatësisë pranë Electronic Frontier Foundation, Thorin Klosowski, thekson se kufizimi i aksesit vetëm në foto të zgjedhura i ndihmon përdoruesit të kenë kontroll më të madh mbi atë që ndajnë dhe redukton rrezikun e ekspozimit të paqëllimshëm të përmbajtjes personale.

Sipas specialistëve, albumi i fotove në telefon nuk përmban vetëm imazhe personale të përditshme, por edhe dokumente të ndryshme që mund të përfshijnë të dhëna identifikuese, si karta identiteti apo karta bankare, të cilat mund të keqpërdoren në rast të aksesit të pakontrolluar.

Një pjesë e shqetësimeve lidhet edhe me përdorimin e inteligjencës artificiale në disa platforma, ku në raste të caktuara imazhet e përdoruesve mund të përpunohen automatikisht për qëllime sugjerimesh ose redaktimi, duke ngritur pyetje mbi mënyrën e përdorimit të të dhënave vizuale dhe analizimit të tyre.

Ekspertët rekomandojnë që përdoruesit të rishikojnë rregullisht lejet që u japin aplikacioneve në pajisjet e tyre dhe të zgjedhin opsionin minimal të aksesit të nevojshëm për funksionimin e shërbimit, në mënyrë që të ruajnë më mirë privatësinë e tyre.